Shillong, Jylliew 16
U Chairman ka TIPRA Motha, u Pradyot Manikya Deb Barma u la ong ba ka “jingjop ba shisha jong ka Meghalaya ka dei ki ‘Homestay’ jong ka” bad ban jur ba ki kam jngohkai pyrthei ki dei ban tei ïa ka basa-jingim ne ka ‘ecosystem’ ha kaba ki nongshong shnong ki ïoh jingmyntoi pura.
U Barma u la ong ïa kane ha ka “Bringing Glory to Ashta Lakshmi: Nurturing Potential through Tourism” jong ka ‘North East India Infrastructure Summit and Exhibition’, 2026.
Haba pynïaid ïa ka jingïalang bad kaba la pynïaid lang da u Chief Secretary ka Jylla, u Dr. Shakil P. Ahammed, u Barma u la ong ba ki kam jngohkai pyrthei ki dei ban thaw ïa ki “lad ki kabu ba kynthup lang ïa ki nongshong shnong” bad ym ban sahkut tang ha ki ‘Hotel’ bad ki nongpynïaid kam.
Hadien ka jingïalang u la pynkynmaw biang, “ki kam jngohkai pyrthei ki dei ban ai jingmyntoi ïa ki nongshong shnong da kaba thaw ïa ka basa-jingim ha kaba ki briew ki sngewthuh pura ïa ka jinglah (jong ka) ha ka liang ka ïoh ka kot bad ka imlang-sahlang”.
Ki nongïashim bynta ki la mynjur ba ka jingsuk kaba neh, ki lad pynïasoh kiba kham biang bad ka jingïashim bynta lang jong ki imlang-sahlang ki long kiba kongsan ban pynkylla ïa ki jingsngewthuh bad ban pyntyllun ïa ka jingkiew ha ka roi ka par hapoh ka thaiñ ba la lamkhmat da ki kam jngohkai pyrthei.
Na ka liang u Dr. Ahammed u la pynpaw ïa ka jingthmu jong ka Payment for Ecosystem Services jong ka Jylla ban pynshlur ïa ki paidbah ban ïada ïa ki khlaw ki btap.
Shuh shuh u la kdew ïa ka jingkyrshan jong ka Jylla na ka bynta ki kam jngohkai pyrthei ha ka imlang-sahlang, da kaba kdew ba ka Sorkar “ka ai jingïarap 70% na ka bynta ki ‘riew shimet kiba seng ïa ki ‘Homestay'” bad ka la wanrah ruh ïa ka ‘Chief Minister’s Boutique Homestay Scheme’, ha kaba ki nongsengkam kiba dei hok ki lah ban ïoh ïa ka “jingïarap kaba haduh T.80 lak na ka bynta ban tei ïa ki ‘Homestay’ kiba ha ka kyrdan kaba paka.”
Kane ka jingïalang ba 2 sngi ka la sakhi ïa ki jingïakren halor ki jingbei tyngka, ki lad pynïasoh ‘Digital’ bad ki kam jngohkai pyrthei kum ka nongpynïaid ïa ka jingkiew ha ka ïoh ka kot na ka bynta ka thaiñ.
