Shillong, Jylliew 16
U Symbud Myntri Rangbah ka Jylla, u Bah Sniawbhalang Dhar ha ka Sngi Ba-ar u la ong ba ka prokram UNNATI jong ka Meghalaya ka kynthup ïa “ka jinglah ban bei tyngka kaba la antad haduh kumba T.653 klur” ha ka liang ki kam jngohkai pyrthei, ka koit ka khiah bad ki kam pynmih jingbam, katba ka Jylla ka dang wanrah ïa ki jingkylla ha ki ‘Startup’ bad MSME ha ka ‘North East India Infrastructure Summit and Exhibition’, 2026.
Haba kren ha ka kylla jingïalang jong ka MSME, “UNNATI & Beyond” kaba u la pynïaid, u Bah Dhar u la pynïadei ïa ka jingïohi ha ka liang ka jingbei tyngka bad ka jingkyrshan naduh tynrai lyngba ka sienjam jong ka PRIME ha ka Jylla.
“Ka PRIME ka la kyrshan ïa palat 493 ngut ki nongseng kam seng jam, ka la pynsuk ïa ka jingpyllait pisa kaba palat T.30 klur bad ïarap pynrung kyrteng ruh ïa palat 1,500 tylli ki ‘Startup’,” u la ong.
Ki heh ophisar ha ka jingïalang ki la ban jur halor kumno ban weng ïa ka jingeh na ka bynta ki kam khaïi barit bad ban pyndonkam hok ïa ka jinglah jong ki.
U Commissioner & Secretary, u Sanjay Goyal u la ong ba “ka jingpyntbit kyrpang, ka jingpynbeit kyrdan, ka jingai jinghikai bad ka jingkyrshan ba btin lynti” ki long kiba kongsan bha, bad pynpaw “ïa ka jingdonkam ban weng ïa ki jingma ha ka liang ki jingbei tyngka na ka bynta ki nongseng kam barit, khamtam eh ïa ki kam karkhana (barit) kiba long ka bynta kaba kongsan jong ki kam khaïi ha ka Thaiñ Shatei Lam Mihngi.”
Kumjuh, u Commissioner & Secretary, Bah Cyril Diengdoh u la batai bniah halor ka jingkyrshan ki polisi na ka bynta ki nongbei tyngka, da kaba kdew ïa ka ‘Meghalaya Investment Promotion Facilitation Act’, 2024 bad ka ‘Meghalaya Investment Promotion Authority’.
U la ong ba ka ‘CM ELEVATE’ bad ka ‘Meghalaya Homestay Mission’ ki tyrwa “haduh 70% ka jingkyrshan ‘Subsidy’ sha ki nongsengkam” ha ryngkat ka jingïoh ban shim ram lyngba ki paralok kum ka Meghalaya Rural Bank.
“La jan hajar tylli ki kamra ki la mih na ka ‘Meghalaya Homestay Mission’,” la bynrap biang u Bah Cyril Diengdoh.
Ka nongseng kam lajong, ka Neera Sarmah kaba la tip kum ka “Bamboo Lady” kaba shong ba sah ha Shillong ka la pdiang sngewbha ïa kane ka sienjam.
“Ki samla jong ka Meghalaya ki long kiba tbit bha ban trei ïa ki kam siej bad ban shna ïa ki tiar ki tar ba mih na u siej,” ka la ong.
U Myntri Sorkar, Bah Lahkmen Rymbui u la kren halor ki lad kamai ha ki nongkyndong kiba ïadei bad ka ‘bio-energy’, da kaba kdew ïa “ki jingïasyriem hapdeng u synsar bad u siej bad ka jinglah ban pyndonkam ïa ki ban pynmih bording ‘bio-energy’.”
Shuh shuh u Dr. J.B. Ekka, u Addl. Chief Secretary ka Assam, haba ai jingkren ha ka jingïalang, u la ong, “Ka Thaiñ Shatei Lam Mihngi ka sakhi ïa ka jingkylla kaba sted bad ka jingkiew ha ka liang ki kor teknoloji” bad “ka don ka lad ïa ngi ban pyndonkam ïa kine ki teknoloji bad ban ïaid ryngkat bad ka ri.”
Ha kane ka sngi, la don lang ruh u Myntri Sorkar, Bah Sosthenes Sohtun.
Kane ka jingïalang ba 2 sngi ka la sakhi ïa ki jingïakren halor ki jingbei tyngka, ki lad pynïasoh ‘Digital’ bad ki kam jngohkai pyrthei kum ka nongpynïaid ïa ka jingkiew ka roi ka por ha ka thaiñ..
