Jowai, Jylliew 16
Ka 36th Annual Regional Meeting (ARM) jong ka Young Men’s Christian Association (YMCA) Northeast Region of India (NRI) mynta u snem ka la long ha ka shnong Nongtalang, West Jaiñtia Hills District, Meghalaya. Kane ka jingïalang kaba ju long shisien shisnem ka la sdang naduh ka 11 tarik Jylliew bad ka la kut ha ka 13 tarik Jylliew 2026, ha kaba la wan ban ïashim bynta da ki dkhot ka YMCA na ki Jylla bapher-bapher jong ka thaiñ Shatei Lam-Mihngi.
Ka jingïalang ka la kynthup ïa shibun ki prokram kiba ïadei bad ka jingpynkhlaiñ ïa ki kam jong ka YMCA, ki jingïakren halor ki phang kiba kyntiew ïa ka bha ka miat jong ka imlang sahlang, ki jingrwai, ki jingïalang pynbeit kam bad ki jingïamir jingmut halor ki kam jong ki samla.
Ha ka sngi plie, la pdiang sngewbha ïa ki nongwan na ki Jylla kum na Mizoram, Nagaland, Arunachal Pradesh, Sikkim bad na Meghalaya da u Bah F.H. Rymbui, President jong ka Nongtalang YMCA. Hadien kane la ïoh ïa ka jingkren lyngkot na u Bah Shamir J Thabah, Regional Secretary jong ka YMCA Northeast Region of India.
Ha ka Technical Session, u Bah Ruhipaia C. Phawa, dkhot jong ka Jowai City YMCA, u la ai jingkren halor ka phang “Media and Youth Empowerment.” Ha ka jingkren u la ban jur ba ka media ka dei ka atiar kaba don bynta kaba khraw ha ka jingpynkupbor ïa ki samla da kaba ailad ban wad jingtip, pule, bad pynpaw ïa ki sap ki phong jong ki sha ka pyrthei.
U la ong ruh ba watla ka media ka ai shibun ki jingmyntoi, hynrei ki samla ki dei ban long kiba husiar ïa ki khubor lamler bad ki jingtip bym shisha kiba jur bha mynta ha ki social media.
U la ong ba ha ki por jong ka jingpang, ka jingsngewsih ne kino kino ki jingeh ha ka jingim, ki samla ki dei ban wad nyngkong ïa U Blei lyngba ka jingduwai bad ka jingpule ïa ka Baibl ym ban wad jingsngewsynei lyngba ki jingpost ha ki social media. Ha kaba kut, u la kyntu ïa ki samla ban pyndonkam ïa ka media kum ka atiar ban shakri, ban kren ïa ka jingshisha bad ban long ki sakhi kiba bha na ka bynta U Khrist.
Hashwa ban sdang ïa ki jingïalang jong kane ka sngi, la ïoh ïa ka jingduwai step na u Saroy Das, President jong ka YMCA Gangtok, Sikkim. La pynlong ruh ïa ka jingïalang plie kaba lyngkot ha kaba u Bah Jamshaphrang Pohtam, MDC, u la long kum u kongsan, katba u Bah Rijiedmi Lamin, dkhot jong ka Nongtalang YMCA, u la pynïaid ïa ka jingïalang.
Ha ka jingkren jong u kum u kongsan, u Bah Jamshaphrang Pohtam u la ai jingïaroh ïa ka YMCA kaba la shim ïa kane ka sienjam ban pynshlur ïa ki samla ha ka jingïakhun pyrshah ïa ka jingkylla ka suiñbneng. U la ban jur ba ka ‘climate change’ kam dei tang ka mat mariang hynrei ka dei ka jingeh kaba dawa ïa ka jingkylla ha ka rukom pyrkhat bad jingïadei jong u briew bad ka mariang.
Ha kane ka sngi la pynlong ruh ïa ka jingai burom ïa ar ngut ki nongïalam YMCA kiba la trei shitom ban kyntiew ïa ka seng, kata ïa u Bah F.H. Rymbui, President ka Nongtalang YMCA bad u Bah John Shullai, President ka Jowai City YMCA.
Ka jingïalang kaba ar sngi ka la kut da ka jingjop, bad ka la pynskhem biang ïa ka jingangnud jong ka YMCA ban trei na ka bynta ka jingpynkupbor ïa ki samla, ka jingïada ïa ka mariang bad ka jingtei ïa ka imlang sahlang kaba kham bha ha ka thaiñ Shatei Lam-Mihngi.
