Shillong, Jylliew 16
U Bah Heaving Stone Kharpran, MLA ka Mawryngkneng Konstitwensi, ha ryngkat ki engineer ka tnad PHE, ki la hiar ban jngoh da la ki khmat ïa ka jingpyntrei shaid-shaid ïa ka dam um ha ka shnong Nonghali.
Kane ka dam um, kadei kaba shna lyngba ka New Shillong Township Water Supply Scheme, ka ban ai jingmyntoi sha palat 75 hajar ngut ki nongshong shnong ha New Shillong bad ïa kane ka dam, ki surok, ki jaka sam um, la buh thong ban pyndep noh ha u snem 2027.
Haba kren sha ki lad pathai khubor, u MLA ka thaiñ u la ong ba na ka por sha ka por u ju kren ha kaba ïadei bad kane ka dam ha Ïingdorbar, bad lyngba kane ka Water Supply Scheme, palat 30 tylli ki shnong kin ïoh jingmyntoi.
U la ïathuh ba ïa kane ka projek, la pynshna da ka M/s BAC Infratech Private Limited, kaba dei ka kompeni na Hyderabad.
Namarkata, u la kyntu ïa ki engineer ba kin pyndep ïa ka jingtreikam katkum ka por ba la buh, khamtam ïa ka surok kaba jngai kumba 3 kilometer, ka ban poi haduh kane ka dam bad watla ka kam ka suki ban pyntrei, hynrei kyrmen ba yn lah ban pyndep katkum ka por ba la buh.
U MLA u la ïathuh ba ka jingjylliew ka long 29 meter, ka jingjngai ka long 165 km bad katkum ka jingmang ba la ïoh, la pynkiew noh ïa ka na ka T.553 klur sha ka T.770 klur.
U MLA u la banjur ba nangne shakhmat, ym dei shuh ban pynkylla ïa ka jaka jong ki projek, namar kan ktah ïa ka pla tyngka jong ka Sorkar.
