Shillong, Jylliew 16
Ki dkhot ka Jaiñtia Coal Owners, Miners Suppli-ers Workers Association (JCOMSWA) ki la hap ban rah bad pynkit noh ïa u President Bah Marshal Biam sha Woodland Hospital, Ialong ha ka por janmiet namar ka jingshitom na ka jingkem tlot palat ka met.
Ka jingkem tlot jong ka met bad ktah ïa ka koit ka khiah jong u Bah Marshal ka dei hadien ba u la shong shah thngan kaba la ïaid haduh 16 sngi, ka jingïakhih kaba u la pynlong ban dawa na ka Sorkar ba kan plie noh ïa ka kam tih dewïong.
Hadien ka jingkit noh ïa u Bah Marshal sha hospital, ha ka jaka jong u la wan mih bujli bad bteng ïa ka jingshong shah thngan da u Bah Jesper Thoo, na Rymbai uba dei u dkhot ka JCOMSWA.
Ka jingrah noh ïa u Bah Marshal kaba u la shong shah thngan ha Ladrymbai Dongwah ka dei namar ka jingtlot bad ym don bor shuh wat lada la ai da ka drip ha kine ki khyndiat sngi, kumta ki dkhot ki la rai ban rah beit sha Woodland Hospital khnang ban pyllait ïa u na kano-kano ka jingmynsaw.
Ka jingleit rah ïa u sha jaka sumar ka dei hadien ba ki la dep wan tur sha ophis u Deputy Commissioner ka East Jaiñtia Hills District kaba la long ha ka sngi Ba-ar, ka 16 tarik Jylliew da ka jingkyrshan ki paidbah kiba la sdang ban mih na jaka shah thngan u Bah Marshal.
Ka seng ka la rai ruh ban sa leit ïakynduh ïa u Chief Secretary ka Jylla lashai ka sngi ka 17 tarik Jylliew ha Main Secretariat Shillong ban ïakren halor ka jingdawa ban plie ban tih dewïong hapoh ka Jylla.
Kane ka jingkloi ka seng ban leit ïakren ka dei hadien ka jingïakynduh bad u Deputy Commissioner ka East Jaiñtia ha ka sngi Ba-ar hadien ba ki la leit tur sha ophis da kaba sdang na jaka shah thngan u President Bah Marshal biam.
Na ka liang u DC u la bthah ïa ka seng ban jied ïa ki nongmihkhmat ban leit ïakynduh lashai ka sngi ha ka por 2:30 janmiet ha Secretariat.
Ka jingshah thngan u Bah Marshal haduh mynta ka sngi ka 16 tarik Jylliew ka la long kumba 16 sngi kaba u la sdang naduh ka 1 tarik Jylliew ban pynbor ïa ka Sorkar Jylla ban plie noh ïa ka jingtih dewïong ha Jylla khnang ban wanrah biang ïa ka kamai kajih jong ki paidbah.
