Shillong, Jylliew 16
Ki kam tuh kam thiem ki dang ïai bteng na kawei ka sngi sha kawei pat bad ïa kine lah ban sakhi na ki jingjia shah tuh kiba dang shen ha kylleng ki bynta jong ka nongbah Shillong.
Katkum ka khubor kaba la ïoh na ki pulit la ong ba u Yiangki Kharthangmaw u la ai ka jingujor ba ha ka 13 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AC-8037 na ka jaka sah ka jong u, kaba don ha ka thaiñ Langkyrding, Shyiap, Shillong.
Ha kawei pat ka khubor, u Alerick Kharjana ruh u la ai ka jingujor ba ha ka 12 tarik mynta u bnai ha ka por kumba 9 baje mynstep, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-T-1101 najan jong ka jaka sah ka jong u kaba don ha Lumdiengsoh, Laitumkhrah, Shillong.
Kumjuh ruh na ka liang jong u Lambha Kupar u la ai ka jingujor ba ha ka 14 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AB-2291 najan ka jaka ka jong u, kaba don ha Nongmensong Umkdait, Shillong.
Ha kawei pat ka khubor, ka Biba Lama ka la ai ka jingujor ba ki runar bym lah ban ithuh ki la tuh ïa ka ksiar, ki khadu rupa bad ka pisa kaba long T.25,000/- na ka jaka sah ka jong ka, kaba hap hapoh ka thanad Lumdiengjri, Shillong. Na ka liang jong kane ka nongujor ka la suba jur ba uwei u briew ba tip kyrteng kum u Parash Lama ba u lah ban donkti ha kane ka kam.
Ha kawei pat ka khubor, u Junior Engineer, ba khmih ïa ka shnong Dinshalalu ha East Jaiñtia Hills, u la ai ka jingujor ba ha ka 4 tarik mynta u bnai, ha ka por kumba 7.15 janmiet, u la tip ba ki runar bym lah ban ithuh, ki la tuh ïa ki ar tylli ki pump set kiba shongdor kumba T.70,000/- (35,000 kawei) napoh ka Deinshalalu pump house ha EJH.
