Shillong, Jylliew 16
Ka All Meghalaya Domestic Workers Union (AMDWU), ka ai khublei ïa baroh ki nongtrei ïing briew ha kane ka International Domestic Workers Day.
Haba kren bad ki nongthoh khubor ha Shillong Press Club ha ka 16 tarik u Jylliew 2026, ka Vice President jong ka AMDWU, ka Kong Elbina Mary Nongkhlaw ka la ong, ba baroh kidei ban ïa ïoh bynta lang, la kadei ha ka kam ka jam ne ha ka imlang ka sahlang, ha kine ki snem ba la dep la ju ïohi, ba ïa ki kynthei ki ju shah ban niew beiñ.
Ka la ong ruh, ba ka Gender Justice ka mih shakhmat ban ai ïa kata ka jingïaryngkat bad ban ym don ka jingnoh shiliang ha ka imlang ka sahlang.
Haba phai sha kiba bylla ïingbriew da ki hajar ngut ki longkmie, ki im da kaba shu bylla ïing briew, bad haba ki trei sha ki ïing ki sem, ki sngew dei ba ma ki ruh ki dei ban ïoh ïa kata ka hok bad ban shngaiñ ha ki jaka trei ka jong ki.
Ka la ong ruh ba lada peit ha kine ki sngi shibun ki nongtrei ki mat ïa kita ki jingshah leh tohmet, ha kaba ka la pynpaw ruh ïa ka jingjia, kaba dang shu jia shen, da kaba bynrap “Ngi donkam ban mih shakhmat lada don ki jingshah ban beiñ”.
Ka Union ka ju ïai dawa na ka por sha ka por na ka Sorkar, ban don la ka jong ka Welfare Board na ka bynta ki Domestic Workers, namar ki sngewthuh ïa ka jingshngaiñ lada ki don ïa la ka jong ka Board, bad kumba ïoh lem ïa ka hok kum kiwei ki nongtrei, la ong ka Kong Elbina.
Ka Kong Elbina Nongkhlaw ka la ong ba bun ki longkmie ki duna ïa ka jingnang jingstad, hynrei ka Union ka lum ïa ki bad trei ban dawa ïa ka hok jong ki nongtrei bapher-bapher.
Namarkata, ka Kong Elbina ka la kyntu ïa baroh kiba trei ïing briew ban wan shakhmat ban pynrung kyrteng bad ka union na ka bynta ka jingbha ka jong ki, ka union ka ju leit ban ai jinghikai bad pynsngewthuh sha baroh ïa ka jingdonkam ban register bad ka kynhun.
Haba ïadei bad ka jingsiew ïa ki nongtrei bylla sngi, ka union ka dawa ba ki trai ïing, kidei ban siew 600 tyngka shi sngi ïa kito kiba trei baroh shi sngi ha ïing jong ki bad na ka bynta kito kiba trei kynta, ka Union ka dawa ba ki trai ïing ki dei ban siew 3,000 tyngka shi bnai.
