Shillong, Jylliew 16
Ka kam thok pisa ka dang ïai jia na kawei ka sngi sha kawei pat bad ïa kane ka jingjia la sakhi lyngba ki jingjia ba dang shen kiba la jia ha nongbah Shillong.
Katkum ka khubor na ki pulit la ong ba uwei u nongshong shnong jong kawei na ki dong jong ka nongbah Shillong u la ai ka jingujor ba ha ka 1 tarik u Jymmang, 2026, ar ngut ki briew kiba la tip kyrteng kum u Swaroop Roy, Regional Sales Manager bad u Sumit Kuri, Sale Officer jong ka kompeni Mother’s Fresh Food Pvt., Ltd., Guwahati, ba ki la thok pisa ïa u haduh kumba T.1,06,155/-.
Ha kawei pat ka khubor, uwei u nongshong shnong jong kawei na ki dong jong ka nongbah Shillong u la ai ka jingujor ba ha ka 11 tarik mynta u bnai, ha ka por kumba 3.45 janmiet, uwei u briew bym lah ban ithuh, uba la kam ïalade kum u nongtrei jong ka Bank of India, u la thok pisa ïa u haduh T.48,915/-.
Ha kawei pat ka khubor, u Brian Christopher Syiemlieh uba na Laitkor, Lumheh Pamsubon (EKH) u la ai ka jingujor ba ha ka 2 tarik mynta u bnai, uwei u briew bym lah ban ithuh, la kynnoh ba u la pynjulor ïa ka kor sei pisa ne ka ATM jong ka SBI kaba la pyndait ha ïew Polo, Shillong, ha ka por ba u la sei pisa.
