Shillong, Jylliew 16
Ki bahaïing hasem ki la dap da ka jingkmen hadien ba u khun jong ki, u David Osmone Lyngdoh Tron uba na ka shnong Umlyngka Dongmawria u la wanphai biang sha ïingsah ha ka sngi Ba-ar ha ka por kumba 11:30 mynstep.
Ka jingkmen ki bahaïing ka dei namar une u samla u la jah na la ïing naduh ka 4 tarik Jylliew, 2026 kaba la dap ar taïew haduh mynta ka sngi ba u la wanphai.
Ïa une u samla na ka liang ki bahaïing hasem, ka shnong ka thaw bad ki pulit ki la ïaleh shitom ban wad ïa u hynrei kim shym la lap ïa u kat haduh ba kim shym poi pyrkhat shuh ba un dang wanphai.
Haba ïakren bad ka Dr. Hanna Kharbuki kaba dei bahaïing ka la ïathuh ba une u samla u don jingshitom bad u sah beit marwei ha ïing namar u kwah ban im marwei.
Ka la ai khublei ïa ka shnong, ki pulit kiba la trei shitom ban wad ïa une u samla naduh ba u la jah.
Ka la ïathuh ba ha ka por ba u jah u don uwei u bahaïing uba ju ñiah kali u la ïohi sha Them Ïew Mawlong hynrei u leit sha Anjalee ban leit dihsha bad ha ka CCTV haba ki peit ki la ïohi ba u dang siew pisa bad ap ruh ïa ka pisa kaba tam.
Ka la ïathuh biang ba une u nongñiah kali u dang mut beit ba u wan ïew ban thied jingthied hynrei haduh 2:00 baje nohphai sngi u khlem wanphai bad ynda la dap 5:00 baje janmiet ki bahaïing ki la sdang ïa wad ban pyntip sha ka shnong bad sha ki pulit.
Na ka liang ki bahaïing bad ki pulit ki la leit wad shaduh Nongpoh namar don kiba ïohi ba u leit pan ja ha kawei ka dukan.
“Ha kato ka sngi ba u jah, ngi la leit wad ruh shaduh sha Jorabad hynrei namar haba ngim lap ngi la wanphai noh bad ar kali ki la sah ha Nongpoh ban leit wad,” ka la ong.
Ka la ainguh ïa U Blei ba u la pynkmen ïa ki bahaïing namar ki la ïakynduh biang ïa une u samla uba la jah namar u la wanphai hi sha ïing.
Ka la ïathuh ba une u samla u la tlot namar u la jah na ïing hynrei um ju treh ban leit hospital kumta ka kyrmen ba un sa ïoh ban leit phah peit ha ki doktor ynda la wan ki pulit.
