Jowai, Jylliew 17
Ka Jaiñtia Tribal Trader’s Association (JTTA) ha ka 17 tarik Jylliew kala pynlong ka jingïaid rally kaba sdang na Dulong haduh ophis jong ka Jaiñtia Hills Autonomous District Council (JHADC).
Kane ka jingïaid rally ka long hadien ka rai ba la shim ha ka jingïalang paidbah kaba la long ha dorbar hall barim ka Dulong na ka bynta ban ïakren lane pynsngew haba ïadei bad ki dukan ha Iawmusiang Shopping Complex.
Ha ka jingïalang da kawei ka sur la dawa ba baroh kiba don permit shwa ban pynkynriah ïa ka Iawmusiang sha Lad Stadium ki dei ban ïoh dukan ha katei ka Complex thymmai.
Ha ophis JHADC ki nongïalam ka Jaiñtia Tribal Trader’s Association kila ïakynduh ïa u EM In-charge ka Market Ma Bison Roy uba pynsngew ïa kajuh ka thong ban nym ailad ban plie ïa ka Iawmusiang Shopping Complex katba ym pat dep pynbeit ïa ki kam ki jam ba ïadei bad ki dukan.
