Jowai, Jylliew 17
Ki pulit ka West Jaiñtia Hills ha ka 17 tarik Jylliew kila ïoh jingtip ba uwei u briew ïa uba la tip kyrteng kum u Charles Lamin ba shong basah ha Khimusniang, Jowai u la mih na la ïing ha ka por 4.00 baje mynstep bad um shym la wan phai shuh.
Hadien kata, ki bahaïing jong u ki la sdang ban wad ïa u bad haba ki la peit ïa ka jaka ba don ka mobile phone jong u, la lap ïa ka hajan ka wah Myntdu ha kawei ka jaka kaba kyrteng ka Mootong.
Ki pulit kila pyntip noh sha ki pulit ka Meghalaya Fire & Emergency Services ban ïarap lem ha ka jingwad ïa utei u briew.
Ha ka por kumba 12:00 baje shiteng sngi la sei ïa ka met jong u Charles Lamin na wah Myntdu. Hadien kata, la pynlong ïa ka jingtohkit bad la pyndep ïa baroh ki jingdonkam ha katei ka jaka.
Hynrei ki bahaïing ki la pan pyllait na ka post mortem, bad hadien la aiti noh ïa ka metïap sha ki bahaïing ban pynlong ïa ka jingleh niam kaba khatduh.
