Shillong, Jylliew 17
U Bah Titosstarwell Chyne uba dei u Nongïalam ka Liang Pyrshah ha ïingdorbar ka Khasi Hills Autonomous District Council (KHADC) u la ong ba naduh ba ka Kong Deity Majaw ka la don ha ka shuki kum ka Executive Member bad khmih ïa ka tnad Aiñ, la sakhi ba bun bha ki mukotduma kiba la ai sha ka ïingbishar Meghalaya High Court.
Kane ka jingong u Bah Titos ka dei ha ki kynta kylli jingkylli ban bynrap ïa ka jingkylli ba la buh da ka Kong Grace Mary Kharpuri halor ka jingsahkut ki mukotduma ha ïingbishar Meghalaya High Court kaba la long ha ka sngi Balang ha ka dorbar mang tyngka ka KHADC.
Ka Kong Deity H Majaw kaba dei ka Executive Member ba dei peit ïa ka tnad Aiñ, ka la ïathuh ba ki mukotduma ba sahkut ha ïingbishar ki don haduh 85 tylli, kata 6 tylli ha u 2022, kawei ha u 2023, saw tylli ha u snem 2024, 58 tylli ha u snem 2025 bad 16 tylli ha u snem 2026.
Kane ka la pynlong ïa u Bah Titos ban buh jingkylli ba dei tang ha kane ka EC kaba la ïalam da ka VPP ba bun bha ki mukotduma ban ujor sha ïingbishar High Court bad u la buh ruh ka jingkylli katno tylli kiba ka KHADC ka la jop.
Ka Kong Deity ka la ong ba ha ïingbishar kam dei kum ha madan thma ban tip mano ba jop ne ba rem hynrei ka la pyntip ba ki don ki mukotduma ba la bthah na ïingbishar haba la pyndep ha District Council bad ha kaba ka ïingbishar ka la shu pynkut noh.
Ka Kong Deity ka la ïathuh ba ki mukotduma kiba poi sha ïingbishar Meghalaya High Court ki long ka tnad khaïi, ka tnad Elaka bad kiwei de.
Shuh shuh ka la ïathuh ba ka EC ka la thung ruh ïa ki nongïasaid aiñ uwei u Special Counsel, 3 ngut ki Standing Counsel, uwei Legal Assistant bad la ai ha uwei lada don ki mukotduma kiba kham eh.
