Shillong, Jylliew 17
Ka Sorkar Jylla ka la mynjur ban thaw da kawei ka Committee kaba yn kynthup lang ïa ka Ophis u Deputy Commissioner (DC) ka East Jaiñtia Hills ha ryngkat ka Jaiñtia Coal Owners, Miners, Suppliers and Workers Association (JCOMSWA), halor ka phang ban pynkhreh ïa ka Small Scale Mining Policy na ka bynta ban pynïoh ïa ka hok ki paidbah ka Ri-lum Jaiñtia ba kin ïoh ban tih Dewïong ha ki par kiba rit.
Haba kren sha ki nongthoh khubor hadien ba la wai ka jingïalang ba la khot da u Chief Secretary kaba la long ha Secretariat, u Bah Overcome Dkhar Information Secretary JCOMSWA u la ïathuh ba ka Sorkar ka la pdiang ban pynsangeh shipor ïa u Dewïong ba poi nabar haduh ban wan jngoh u Chief Justice Katakey, kata ha ka 29 tarik Jylliew 2026.
Shuh-shuh u la ïathuh ba ka Sorkar ka la pynshai ba ka don ka skhim ïa kiba shah ktah, ïa kaba la tip kum ka Meghalaya Environment Protection and Restoration Fund (MEPRF) kaba lah ban ïoh lyngba ka ophis u DC East Jaiñtia Hills.
Nalor kata u Bah Overcome u la ïathuh ruh ba ka Sorkar Jylla ka la kular ba kan ïakren ruh sha ka Jaiñtia Hills Autonomous District Council (JHADC) halor ban thaw ïa ka aiñ kaba lah ban ïada ïa ka hok jong ki trai jaka.
Haba kylli la ka Association ka la hun ïa kaba mih na kane ka jingïakren, u Bah Overcome u la ïathuh ba ki khlem hun satia ïa kine ki jingkular jong ka Sorkar bad pynpaw ba ka jingïakhih ban dawa tih Dewïong kan dang ïai bteng tad haduh ban wan jngoh u Katakey bad haduh ba la pynurlong ïa ka jingdawa.
“Katba ngim pat hun ngin ïai bteng ban shah thngan, u President ruh u dang don ha Hospital ban shah sumar bad ngim pat weng ïa ka jingshah thngan” u la ong .
Halor ka jingtih Dewïong da ka ‘Scientific Mining’, u Bah Overcome u la ong ba ka seng kam pdiang ïa ka rukom tih Dewïong kaba mynta kaba long 100 hektar, namar ba ki nongtih Dewïong kiba rit kim don jaka kaba kat kane ka jingheh.
U Bah Overcome u la ban biang ba ka jingshah thngan kan ïaid beit haduh ba kin ïoh ïa ka jingshai haba ïadei ka jingplie ban tih ïa u Dewïong, namar ka jingdawa jong ki ka long ban plie noh ïa ka jingtih Dewïong bad ban ïoh ban trei, u rit u ria kumba mynshwa.
