Nongstoiñ, Jylliew 18
Ka All Meghalaya La-bour Association (AMLA) Mawshynrut Circle ka la pynpaw ïa ka jingsngew-khia halor ka jingdon bun palat jong ki khyrdop lum pisa khamtam lei jong ka Khasi Hills Autonomous District Council (KHADC) tang ha ka surok na Riangdo sha Athiabari, kaba hap ha West Khasi Hills District.
Ha kaba ïadei bad kane ka jingbun jong ki khyrdop bad kaba la ktah ïa ka kamai kajih, ka la pynlong ïa ka AMLA Mawshynrut Circle ban leit ujor sha ka Deputy Commissioner jong ka West Khasi Hills ka Hema Nayak, IAS bad ban pyntip ruh sha ka ophis jong ka KHADC.
Ha ka jingujor, na ka liang jong ki nongïalam ka AMLA Mawshynrut Circle ki la pyntip bad kynnoh ba tang ha kane ka surok na Riangdo sha Athiabari, ki don haduh 12 tylli ki khyrdop, kata tang jong ka KHADC ki don haduh 6 tylli, 3 tylli pat jong ki Hima bapher-bapher bad 3 tylli ki khyrdop kiba leh ïa ka ‘Smoke Test’.
Haba kren sha ki nongthoh khubor ha ka sngi Palei, u President ka AMLA Mawshynrut Circle u Bah Banlang Sohphoh bad u Bah Phidius Rynïong, Secretary ki la ong ba ka seng ka pynpaw ïa ka jingsngewkhia ïa ka jingud ka jingnam jong ki nongñiah kali namar kala ktah shaba palat ha kaba ïadei bad ka jingmih bun palat jong ki khyrdop lum khajna.
Shuh shuh ki la ong ruh ba kaba sngew lyngngoh ka long ba tang kiba dei jong ka KHADC ki don haduh hynriew tylli ki khyrdop lum khajana bad hato kaei ka jingmut ba ha kajuh ka surok ki buh haduh hynriew tylli ïa kita ki jaka khrong pisa. “Katkum ka jingsngewthuh ka jong ngi lada kin buh tang kawei haduh ar tylli ka la biang,” ong u Bah Banlang.
U Bah Banlang u la ong ruh ba teng-teng ki nongñiah kali haba ki bylla kit jingkit ki lait tang khadsan spah bad ar hajar hynrei ka jingdon jong kine ki khyrdop lum khajna kala pynduh nong bad kumjuh ruh kala ktah ïa ki nongkhaïi bad khamtam ïa ki briew jong ka dong ka thaiñ.
“Kaba sngew lyngngoh ba ka Executive Committee jong ka KHADC ba ïalam da ka VPP, ki shait kren bad ki ong, Ngi ïa trei na ka bynta ka ri bad ka jaidbynriew bad ki paradoh para snam jong la jong, hynrei lada ka long kumne ka long khongphong namar kala ktah pynban ïa ka kam bylla kam sngi jong ki paradoh parasnam,” ong u Bah Banlang bad bynrap ruh “Ngi kwah ba phin pynduna noh ne weng noh mardor ïa kine ki khyrdop lum khajna na Riangdo sha Athiabari.”
U Bah Banlang u la ong ruh ba kawei kaba pynlyngngoh shuh shuh ka long ba ki don ki khyrdop lum khajna kiba dei ban buh ha ka lynti sha Nongchram hynrei ki wanrah pynban ban buh ha katei ka surok.
Shuh shuh ki la ïathuh ruh ba ha surok na Riangdo sha Athiabari, ki don haduh 12 tylli ki khyrdop, kata ki khyrdop lum khajna jong ka KHADC ki don haduh 6 tylli, 3 tylli jong ki Hima kynthup jong ka Hima Nongstoiñ, Hima Jyrngam bad Hima Riangsieh, bad 3 tylli pat ki dei jong ka Smoke test.
Shuh shuh ki la ong ruh ba katei ka jingbun jong ki khyrdop lum pisa ka la ktah palat ïa ka khaïi pateng jong u paidbah ka thaiñ khamtam ïa ka ïoh ka kot ha kum kane ka juk kaba hiran ha ka kamai kajih.
Kitei ki nongïalam ki la ïathuh ruh ba nalor ka jingleit buh ïa ka jingthoh sha ka Deputy Commissioner ka West Khasi Hills ha ka 15 tarik mynta u bnai, ka seng halor kane ka bynta dang shen kala dep ruh ban leit ban ai da ka jingthoh ha ka ophis jong ka KHADC, kumta “Ngi kwah ba baroh kin sangeh noh ïa kane ka jinglum khajna bad lada kim lah ban weng na ka liang jong ka seng ngim banse ban leit tied ïa ka jingkhang jong ka ïingbishar Meghalaya High Court.
