Shillong, Jylliew 18
Ka Ïingbishar Meghalaya High Court ha ka sngi Palei, kala bthah ïa ka Sorkar Jylla ba kan ai ïa ki jingtip ba bniah halor ka jingpyndait kor CCTV ha ki thanad hapoh ka Jylla, kynthup ka thanad Laban, kum shibynta jong ka PIL ba dang ïaid halor ka jingkitkhlieh ki Pulit.
Ka Division Bench jong ka Chief Justice Revati Mohite Dere bad Justice W Diengdoh, haba shong bishar ïa ka PIL bala mudui da u Kishan K Nongkynrih, kala bthah ïa ka Jylla ban file ïa ka affidavit bad ai jubab hapoh ka saw taïew.
“Ka affidavit kan ai ïa ki jingkheiñ haba ïadei bad ki kor CCTV bala pyndait ha thanad Laban bad kumjuh ruh ha kiwei ki thanad ba don hapoh ka Jylla, ki jaka ba ki pyndait bad ki video ba don bad kiwei-kiwei,” ong ka Ïingbishar ha ka hukum.
U Additional Advocate General K Khan, uba mihkhmat ïa ka Jylla, u la pan por ban pynkhreh ïa ka jubab. Ka Ïingbishar kala ong ba dei ban ai copy lypa sha u nongïasaid jong u nongmudui ïa kane ka jubab.
Ïa kane ka kam la buh ban bishar biang ha ka 24 tarik Naitung, 2026.
