Shillong, Jylliew 18
U Chief Electoral Officer (CEO) u BDR Tiwari u la pyntip ba lah ban shah pynjlan ka ilekshon MP shiteng samoi sha Lok Sabha na bynta ka Shillong Parliamentary Seat da kaba ong ba hap ban pyndep shuwa ïa ka jingpyntreikam ïa ka Special Intensive Revision (SIR) ha ka Jylla.
Haba kren sha ki nongthoh khubor ha ka Sngi Balang u Tiwari u pynthikna ba ka wat ba nyngkong (First Phase) ban pyntreikam ïa ka Special Intensive Revision (SIR) hapoh Meghalaya kan sdang naduh 20 tarik haduh 29 tarik Jylliew 2026.
Shuh-shuh u Tiwari u la ong ba naduh 30 tarik Jylliew haduh 30 tarik Naitung ki Booth Level Officers kin leit jurip ïa man ki thliew ïing ban pynthikna ïa ka jingdon ki nongthep Vote.”Ka jingpynmih ïa ka ‘Draft Publication’ kan dei ha ka 5 tarik Nailar bad hadien 5 tarik Nailar haduh 4 tarik Nailur 2026 yn plie lad ïa ki paidbah ban mudui” ula ong.
U CEO u la pyntip ruh ba ha ka 7 tarik Risaw 2026, yn pynmih ïa ka thup kyrteng ki nongthep Vote (Final Electoral Roll).
Haba kylli halor ka tarik ban pynlong ïa ka ilekshon MP shiteng samoi na Shillong Parliamentary Seat, u CEO u la ong “Ngi dang hap ban pyndep shwa ïa ka SIR, tharai ka ilekshon MP shiteng samoi ka lah ban shah pynjlan hadien jong u bnai Risaw 2026”.
U CEO u la pynthikna ba ka tnat pynïaid ilekshon kan leh ïa kaba donkam ban pynthikna ba kiba dei hok ban ïoh thep Vote kin shah kynthup ha ka Electoral Roll bad kito ki bym dei ban ïoh thep Vote kin shah weng na ka Electoral Roll.
