Shillong, Jylliew 18
Ka Voice of the People Party (VPP) State Youth Wing ha ka 18 tarik u Jylliew, 2026, ka la leit ban ïakynduh ïa u Abhilash Baranwal, Deputy Commissioner ka East Khasi Hills District, ban buddien halor ka jingdon jong ki bar jylla, kiba long trai ïa ka jaka ba la ker tin blue ha Polo.
Ka VPP SYW ka leit kynduh ïa u DC, ban shimkhia halor ka jinglap lyngba ka RTI ïa ka jingdon ki bar jylla kiba long trai ïa ka jaka ba ker tin blue ha Polo.
Haba kren sha ki lad pathai khubor, u Bah David Umwi, Executive Member ka SYW, u la ong ba ha ka jingpyrshang ban kynduh ïa ka Additional Deputy Commissioner, dang ha kine ki khyndiat sngi ba la dep, ka la kyntait ïa ki ban jubab, da kaba pynshai ba ka la don ka jingujor na kiwei pat ki kynhun.
U la ong ba haba ka VPP ka la pan da ka jingthoh haba ïadei bad kata ka jingujor, hynrei na ka liang ka ADC kam ai satia, da kaba ong “Tang da ka ktien la ïakren halor katei ka jingujor”.
U Bah David u la kynnoh ruh, ba kane ka jingleh ka pyni ba ka don ei-ei sha lyndet.
“Wat nym lehkai seh, haba ngi wad da ka lynti kaba shisha. Ngi dawa ïa ka hok ban tip, ba mano kita ki bar jylla kiba ïoh long trai ïa ka jingker tin blue ha Polo,” u la ong.
Kumta u la ïathuh ba ha ka jingïakynduh bad u DC, u la pynthikna ba un shimkhia halor kane ka mat jingdawa jong ka VPP.
