Mawkyrwat, Jylliew 18
Halor ka kynrum kynram kaba jia ha ka 17 tarik u Jylliew 2026 ha Ïew Borsora ha kaba ka la don ka thma ktien kaba jur hapdeng ki ar kynhun kata ki dkhot ka Seng Samla Hima Langrin bad ki nongïalam jong ka Hima Langrin ha Ïew Borsora, South West Khasi Hills District bad kaba la sakhi ruh lyngba ki durkhih ha kaba na ka liang u Bah P.S Lyngdoh, President Seng Samla Hima Langrin u la kynnoh ba ka don ka jingpynthut jong ki nongïalam ka Hima ha ka por ba ki dkhot ki dang khynra Trading License ïa ki dukan bar jylla kiba wan khaïi ha katei ka jaka.
Na ka liang u Acting Syiem ka Hima Langrin u Bah Briliant Henry Syiemiong u la pynshai lyngba ki lad pathai khubor ba na ka liang ki nongpynïaid Hima kim shym la pynthut ïa ka jingleit khynra Trading License ki dkhot ka Seng Samla, hynrei kum ki nongpynïaid Hima kiba peit ïa ka shongsuk shongsaiñ jong ka ïew ka hat ki shu wan ban kylli ba ki wan leh aiu namar ba kim don jingtip eiei bad hadien ba la ïoh jingpynshai na u Bah P.S Lyngdoh, ki la shah sngewbha ba kin pyndep ïa ki kam jong ki ban khynra Trading Licence hynrei ki la maham pat ba kim dei pat ban pynthut ïa ki kam kiba ktah ïa ka Hima.
Hynrei u Bah P.S Lyngdoh um shym la sngap hadien ba la dep ban khynra Trading License u la leit ban tuklar sa ïa ka khyrdop lum khajna jong ka Hima da kaba kynnoh ruh ba kadei ka khyrdop kaba lum khajna be-aiñ ha kaba ka la mih ka jingïania kaba jur hapdeng ki ar kynhun.
Ha kaba ïadei bad kane na ka liang u Bah Wadlad Lyngdoh Secretary ka Hima Langrin u la pynshai ba kane ka khyrdop kam dei kaba be-aiñ, hynrei kadei ka khyrdop jong ka Hima kaba la don naduh ki por kulong kumah bad u la ïathuh ruh ba ïa kane ka khyrdop ka dei kaba la ïoh jingithuh na ka KHADC bad ki bor District bad kadei ruh ka khyrdop kaba hap hapoh ka khyndew jong ka Hima bad ka Hima ka long trai ïa ka.
Kumta na ka liang ki nongïalam ka Hima Langrin ki pynrem jur ïa u Bah P.S Lyngdoh da kaba kynnoh ruh ba u Bah P.S lyngdoh u dei u briew u ba ju pynkulmar na ka por sha ka por ïa ka suk ka saiñ jong ka Hima.
Katba na ka liang u Bah P.S Lyngdoh haba kren sha ki lad pathai khubor ha katei ka sngi u la ong ba ka jingwan jong ka seng ka long ban leit jurip hato ka don ne em ka jingbuh khyrdop be-aiñ jong ka Hima namar ba katkum ka hukum jong ka District Council kaba pynmih ha ka 15 tarik u Ïaïong 2026 ka long ba u Syiem lane u Acting Syiem um lah ban ai wai ïa ka ïew katba ym pat pynbna khad-ar sngi ïa ka jingaiwai ïa ka mar Hima namar ka pynkheiñ ïa ka Langrin Administration rule Act.
U la kynnoh ruh ba u Acting Syiem u la leh donbor da kaba pynbna ha ka 14 tarik bad ai wai pat ha ka 15 tarik takadaw ka don ka jingpyrshah namar katkum ka kyndon aiñ jong ka Hima kadei ban long khatsan sngi ïa ka jingaiwai.
Kumta u la dawa ïa ka Hima ba kadei ban pynlong shwa ïa ka jingïalang aiwai Hima da kaba pyntip sha ki khun ki hajar shwa ka khatsan sngi.
