Shillong, Jylliew 18
Ka Myntri ba khmih ïa ka tnad Pla Tyngka ka Sorkar Pdeng ka Nirmala Sitharaman kan wan sha Meghalaya ha ka 19 bad 20 tarik mynta u bnai ban ïashim bynta ha ka seminar halor ka “Leveraging Externally Aided Projects in the North-Eastern States” ha Shillong, bad ban plie paidbah bad bishar bniah ïa ki projek jong ka Jylla.
Ka jingiuh kjat ka Nirmala ïa ka Meghalaya kan long naduh ka 19 tarik, kata da ka jingplie bad ka jingjurip ïa ka karkhana pynmih jingber ba heh tam jong ka North East kaba don ha Bhoirymbong Ri-Bhoi District, kaba la pynïaid da ka Eastern Ri Bhoi Organic Farmer Producer Company.
Ha ka por janmiet kata 4:30 pat ka Nirmala kan ai jingkren ha ka prokram ha U Soso Tham Auditorium ha Shillong ban shimbynta ban sakhi jong ka jingïaid shaphrang jong ki Externally Aided Projects ha Meghalaya bad ban buh ïa u mawnongrim na ka bynta ka projek ba thymmai ba la bei pisa da ka EAP kaba shongdor T.1200 klur.
Ha ka 20 tarik Jylliew, ka Myntri Sorkar Pdeng kan leit sha West Jaiñtia Hills na ka bynta ka jingïakren bad ki samla pule jong ka Kiang Nangbah Government College ha Jowai ha ka por 10.15 baje mynstep, bud sa ka jingplie ïa ka Khliehtyrshi Primary Health Centre ha ka por 11.30 baje mynstep.
Ka jingwan jngoh bad ka jingïashim bynta ha ki jingïalang ka dei na ka bynta ban pynpaw ïa ka jingpyndonkam jong ka Meghalaya ïa ka pisa nabar na ka bynta ki jait jingtei kam pynroi, ka rep ka riang ka koit ka khiah, bad ban wad ki lad ki lynti ban pynkhlaiñ ïa ka jingpyntreikam ïa ki EAP ha kylleng ka thaiñ Shatei Lam-Mihngi.
