Shillong, Jylliew 19
Ki pulit ka West Garo Hills, ki la kyndang ïa kawei ka kynhun thok, kaba la kynnoh ba ka la pyndonkam bad shna thok ïa ki kot ki sla jong ka Garo Hills Autonomous District Council (GHADC), bad thok ïa ki supplier, ha kaba la ïoh kem ïa 6 ngut ki briew ba na Assam bad Haryana bad la kurup ïa ki Work Order ryngkat ka song pisa ba T.50,000.
Kane ka jingkhynra bad kem ki pulit, kadei hadien ba la ujor FIR da u Secretary ka GHADC, Tura ha ka 07 tarik u Jymmang 2026, bad ka jingïoh jingtip ba la ïoh na ki lanot, kiba la shah thok bad shah pynbiej, kiba la kam ba kidei kiba pynbeit ïa ki kam shalan mar jong ka Sorkar.
Da kaba shimkhia ïa ki jingtip, ba katei ka kynhun runar ka don ha Guwahati ban thok bad shukor ïa u wei u heh spah na Gujarat da ka Work Order jong ka GHADC, ka kynhun pulit ba la ïalam da u Additional Superintendent of Police, West Garo Hills, ka la leit hiar sha Assam ha ka 12 tarik u Jylliew 2026, bad pyn-ap shrip ha Greenwood Hotel. La kem ïa 5 ngut ki suba donkti na katei ka jaka.
U wei pat ïa uba la tip kyrteng, u Reeturaj Kaundinya ba 50 snem ka rta, la kem na Tezpur, Sonitpur District bad u la shah kem da ka kynhun kaba la ïalam da u Circle Inspector Sadar bad u Ophisar-in-Charge jong ka Tura Police Station.
Kine ki briew kiba la shah kem, kidei ba la tip kyrteng kum Narendra Singh, 46 snem ka rta na Kamrup District, Dip Hazarika, 53 snem na Guwahati, u Kokkal Dutta, 58 snem, na Bongaigaon, u Taposh Mukherjee, 45 snem ka rta, na Faridabad, Haryana, Mridupaban Gogoi, 40 snem ka rta, na Golaghat bad u Reeturaj Kaundinya, 50 snem ka rta na Tezpur.
Ha ka jingtohkit ki pulit ki la ïoh ban kurup ïa ki Work Order ba shna thok ha ka kyrteng ka GHADC, ka Trading License ba la shna thok ïa kaba la ai sha ka kompeni Om Sai Sarees, Surat.
Ïa ki kot ki sla bad ka song pisa ba T.50,000 la kurup na u ba shah kynnoh, ha ka jingdon lang ki sakhi kiba pynshisha.
Ha ka jingtohkit ba nyngkong, ka la lap ba katei ka kynhun runar ka la dep ban ïoh lum ka pisa ba kot T.3 lak, na ki lanot bad ki dangthmu pat ban dawa sa na ka Commission kaba 4% na ki Work Order, ba la shna thok kiba kot haduh T.46 klur ha ka por ba la ïoh kem ïa ki.
Ka jingleh bad shna thok ki Work Order kiba la lap, ka pyni ïa ka jingthmu ban ïoh jingmyntoi bad ïoh pisa na ki heh spah bad ki kontraktor ki bym tip ei-ei ha kylleng ka Ri.
Halor kane, la register mukotduma ha Tura Police Station bad ka jingtohkit ka dangïaid shakhmat ban lap sa ïa ki dkhot kiba donkti lang ha kane ka kam thok.
U Superintendent of Police (SP), u Abraham T Sangma, u la kyntu sha baroh ki suppliers, Kontraktor bad ki nongkhaïi ban pynshisha ïa kano-kano ka Work Order, ka jingthep tender ne ka lisen beit-beit ha ka por shuwa ban siew ka pisa.
U la bynrap da kaba ong, ba ki paidbah lada ki don kino-kino ki jingshah tyrwa ne shah dawa ban siew lypa, kiba suba ba kidei kiba thok, kidei ban pyntip sha ki Thanad, Outpost, Beat House lane sha Police Control Room, Tura ba jan tam, ha u number +91 88374 23053, +91 70055 30510 lane +91 90891 99064.
