Shillong, Jylliew 19
Ka District Administration jong ka East Khasi Hills ka la pyntip sha baroh ki samla pule ki ban ïakhun ïa ka NEET (UG) Re-Examination 2026 ha ka 21 tarik Jylliew 2026 ba kin poi shwa ka por ban thoh eksam namar, ba u Myntri Sorkar Pdeng un wan jngoh ïa ka PM SHRI Kendriya Vidyalaya, EAC Headquarters, Upper Shillong ha katei kajuh ka sngi.
Katkum ki tyllong khubor ba la ïoh lum la ïathuh ba une u Myntri ka Sorkar India u dei u Rajnath Singh uba dei peit ïa ka tnad Ïada Ri un leit jngoh ïa ka jaka treikam ki shipai suiñ kaba don ha Hynñiewmer Upper Shillong.
Namar kane ka jingwan jong ki VVIP bad ki lad jingïada ba la pynkhreh, ka leit ka wan ha ki bynta jong ki surok sha Upper Shillong lah ban shah pynbeit ne pynslem shipor, kaba lah ban wanrah jingdheng kali.
Kumta na ka liang ka bor District ka la kyntu ïa baroh ki samla pule ki ban ïakhun ïa ka NEET (UG) ki ba leit ban thoh eksamin ha katei ka sngi kaba dei ruh ka sngi wan jngoh jong u Myntri ka Sorkar Pdeng la ai jingmut ba kin poi ha ka jaka thoh eksamin shuwa ka por ba la buh ha ki Admit Card jong ki ban lait na kano-kano ka jingeh.
La ai jingmut ruh ïa ki samla pule kiban ïakhun ïa ka eksamin ba kin pynkhreh bha ïa ka leit ka wan jong ki bad ban rah lang ïa baroh ki kot ki sla kiba donkam ban rung sha ka jaka long eksamin.
Ka District Administration ka dang shim ïa baroh ki sienjam kiba donkam ban pynthikna ba ka eksamin kan long kaba ïaid beit khlem jingthut bad ka kyrpad ïa ka jingïatreilang jong baroh kiba don bynta.
