Shillong, Jylliew 19
Ka kynhun ki nongkamai arshaka ka ‘Ride to Serve Shillong’ ka la phah ka dorkhas sha u Symbud Myntri Rangbah ba khmih ïa ka tnat Transport u Bah Sniawbhalang Dhar ba un tuklar kyrkieh halor ka jingkyrpad ba la dap lai snem ban ai ïa ka Permit Shimet (Single Permit) ïa ki ban kamai.
Ha ka dorkhas, ka kynhun ka la kdew ba ka la phah jingthoh sha ka Sorkar naduh ka 24 tarik u Jylliew 2023, kaba pynpaw ba ki la thoh sha ka tnat ‘Transport’ ban ailad ïa ki ban kamai da ka Permit Shimet (Single Permit) khlem da shah teh kyndon lane ba kin hap ban pynïasoh sha ki ‘Aggregator’ ne ki ‘Company’.
Shuh-shuh ka Kynhun ka pynpaw ba ka jingshah ban kamai da ka Permit Shimet (Single Permit) kan thaw ïa ka rukom treikam kaba shai, ha kajuh ka por ka plie lad haba ïadei ka kamai kajih jong ki khun samla. “Haduh mynta, ngim pat ïoh kano-kano ka jingpdiang ne jubab kaba pura na ka tnat watla ngi la ai jingmut bunsien” la kdew ka dorkhas.
Ka kynhun ka la dawa na u Symbud Myntri Rangbah ban bthah ïa ka tnat Transport bad ïa ki ophisar jong ki District ban pynsangeh noh ïa ki kam pynjari aiñ, ka jingai challan, bad ki jingbat ïa ki nongñiah arshaka katba ka Sorkar kam pat jubab ïa ka jingtyrwa ka kynhun.
Haba ïakren sha ki nongthoh khubor, u Bah Kyntiewbor Nongkynrih u ba long kum u Convener ka ‘Ride to Serve Shillong’, u la ïathuh ba na ka liang u Bah Sniawbhalang u la kular ba hadien shi taïew kin sa lah ban ïoh ïa ka Permit Shimet (Single Permit) ynda la dep ka jingïamir jingmut ka ban long hapdeng ka kynhun bad ka Sorkar.
