Shillong, Jylliew 19:
U Chief Executive Member ka Khasi Hills Autonomous District Council (KHADC) Bah Winston Tony Lyngdoh um pat kwah ban kren sha ki nongthoh khubor hadien ba u Bah Pyn-khrawboklin Kharjahrin u MDC na Mawkyrwat Constituency u la iehnoh ïa ka kam kum u Executive Member ban peit ïa ka tnad Building Bye Laws bad Council Building.
Kane ka jingbym pat kwah u Bah Winston ban kren ka dei hadien ba ki nongthoh khubor ki la leit ïakynduh ïa u ha kamra treikam mar shu wai ka dorbar mang tyngka hynrei um kwah ban kren eiei.
Ka jingleit ïakynduh ki nongthoh khubor ïa u Bah Winston ka long ban kylli na kaei ka daw ba u Bah Pynkhrawboklin u iehnoh jyndat ïa ka kam kum u Executive Member hynrei ym shym la ïoh ïa ki daw namar um pat kwah ban kren. Kumjuh ruh haba u Nongsaiñ Hima u la pyrshang ban ïakren bad u Bah Pynkhrawboklin Kharjahrin um shym la kwah ban kren eiei.
Kumban shu pynkynmaw ha kine ki lai sngi ba long ka dorbar mang tyngka u Bah Pynkhrawboklin u la wan beit ha ïingdorbar ban shong naduh basdang haduh ban da kut ka dorbar hynrei shwa ban wai ka dorbar u la mih noh.
Ka jingiehnohkam u Bah Pynkhrawboklin ka la paw pyrthei tad ynda ka Sorkar Jylla lyngba u Commissioner & Secretary ka Sorkar Jylla ba dei peit ïa ka District Council Affairs Bah CVD Diengdoh ka la pdiang ïa ka shithi iehnoh kaba dei mynta ka sngi ka 19 tarik Jylliew 2026.
Kane ka jinghiar shuki u Bah Pynkhrawboklin ka la bna ha kine ki khyndiat sngi hynrei ym shym la tip thikna hynrei ka la paw pyrthei mynta ka sngi.
Da ka jinghiar shuki u Bah Pynkhrawboklin ki EM mynta ki sah satang 7 ngut kynthup ïa u CEM.
Ha kine ki ar snem ba la synshar ka VPP ïa ka KHADC ka jinghiar shuki ka la jia arsien kaba nyngkong ka dei ka jinghiar shuki u Bah Shemborlang Rynjah kum u CEM bad mynta sa u Bah Pynkhrawboklin Kharjahrin kum u EM.
