Nongpoh, Jylliew 19
Kawei ka kali Tata Punch kaba don ïa u nombor ML-10-D-6974 ka la pra phom na ki bynta ba shakhmat hadien ka jingleit tynrah nadien ïa ka trok Dumper kaba don ïa u nombor ML-11-A-2486 ha ka surokbah National Highway 6 ha Nongpoh.
Katei ka jingjia ka la jia ha ka miet Sngi Palei ha ka por kumba 10 baje eiei katba katei ka trok Dumper kaba kit mawria na ka shnong Killing ban pynhap sha Pahamsyiem ka dang ïaid suki-suki bad katei ka Tata Punch kaba la pynher sted, ka la leit tynrah beit-beit nadien.
Ha kane ka jingjia, u nongñiah katei ka Tata Punch ula ngat ha ka jingmynsaw bad la pynkit noh ïa u mar mar sha Civil Hospital Nongpoh na ka bynta ban ïoh jingsumar. Naka liang ki pulit ka Nongpoh Police Station ki la tan noh ïa baroh ar kitei ki kali sha thanad naka bynta ban pynlong ïa ka jingtohkit.
