Nongpoh, Jylliew 19
Sa kawei de ka jingjia tyngkhuh kali ha Ri-Bhoi, ka kali Hyundai Grand i10 kaba don ïa ka jingthoh ‘PRESS’ nakhmat hadien ka jingpynher sted kaba palat, ka la leit ban jam na shiliang sha shiliang ka surokbah National Highway 6 ha Jyntru bad leit ban tynrah pat ïa ka Tata Nexon kat haduh baroh ar kitei ki kali ki la julor bun.
Katkum ka tyllong khubor, la ïathuh ba katei ka jingjia ka la jia ha ka por 5 duna eiei ha ka janmiet Sngi Thohdieng katba katei ka Hyundai Grand i10 kaba don ïa u nombor ML-05-L-8767 ka dang kiew sha nongbah Shillong.
Namar ka jingpynher sted palat, u nongñiah um lah shuh ban teh lakam ïa ka kali bad leit ban jam sha shilliang ka surokbah bad tynrah pat ïa ka Tata Nexon kaba don ïa u nombor TG-07-E-5517 kaba dang hiar sha nongbah Guwahati.
La ïathuh ruh ba tang mar ïa dep tynrah, u nongñiah katei ka kali Hyundai Grand i10 u la phet krad ïalade na katei ka jaka bad ieh jyndat ïa uwei pat uba shong hapoh kali, uba la ngat ha ka jingmynsaw kaba malu-mala.
La ïoh jingtip ruh ba lai ngut kiwei pat kiba shong hapoh katei ka kali Tata Nexon ruh ki la ngat lang haka jingmynsaw kaba malu-mala.
Haba ïoh ban ïakren bad utei uba shong hapoh ka kali Hyundai Grand i10, u la ïathuh ba ka kali ka dei ka jong u kpa jong u bad ba u dang thmu ban kiew sha Shillong ryngkat bad utei u draibar uba la phet krad na katei ka jaka. U la ïathuh ruh ba um shym la tip eiei kumno katei ka jingjia tyngkhuh kali ka la jia naba u don hapdeng ka jingïohthiah ha katei ka por.
Na ka liang ki pulit ka thanad Nongpoh kiba la wan poi ha katei ka jaka, ki la tan noh ïa baroh ar tylli ki kali sha thanad na ka bynta ban pynlong ïa ka jingtohkit.
