Shillong, Jylliew 19
U Myntri Rangbah ka Jylla Conrad K Sangma ha ka Sngi Thohdieng, u la khot ïa ki karkhana pynmih Musla Organic (Organic Spice Processing Plant) ha Ri-Bhoi kum ka “Sienjam ban wanrah Jingkylla” na ka bynta ki nongrep bad u la ai nam ïa ka jingkyrshan ba phra snem sha ki kam ba thmu ban kyntiew ïa ka ïoh ka kot ki nongkyndong ha kylleng ka Jylla.
Haba ai jingkren ha ka jingïalang ha ryngkat ka jingïadonlang ka Union Finance Minister jong ka Ri, ka Nirmala Sitharaman, u Conrad u la ai khublei ïa ka Myntri namar ka jingkyrshan jong ka ïa ka roi ka par jong ka thaiñ Shatei Lam-Mihngi.
U la ong ba naduh u snem 2018, ka Sorkar Jylla ka la pynleit jingmut ha ka ban kyntiew ïa ki nongrep, ki jingtei kiba kham biang, ka jingpynïaid bha ïa ki ïew, ki jingai jinghikai bad ka jingpynmih ïa ki mar ba kham heh dor. “Ngi la tei ïa kaei kaba ki nongrep ki la leh bha, ki rukom rep tynrai bad ngi la ai jingkyrshan ïa ki da ka song pisa, ka jinghikai bad ka jingpynïasoh sha ki ïew ïa ki kynhun nongrep ” u la ong.
U Conrad u la pynpaw ba ka Jylla Meghalaya ka la don mynta haduh 11 tylli ki Processing Unit kiba la ai ka jingkyrshan ïa kumba 55,000 ngut ki nongrep bad ka ïing ka sem jong ki. “Ki sienjam kiba rit, ki lah ban wanrah ïa ki jingkylla kiba heh ha ka kamai jakpoh bad ka ïoh ka kot ha ki nongkyndong” ula ong.
U la pynpaw ïa ka jingai jingmut jong ka Finance Minister haba ïadei bad ka jingpynpoi mar, ka jingshalan bad ka jingpynmih ïa ki mar ba kham heh dor, da kaba ong ba ka Jylla ka la pyrshang ban pynbiang ïa ki Cold Storage, ka jingbha ki mar bad ka jingneh slem ki mar khnang ba kin lah ban poi sha ki ïew kiba heh.
U la pynpaw ruh ïa ka jingnang kiew ka jingïatreilang hapdeng ki Jylla jong ka thaiñ Shatei Lam-Mihngi. “Ka thaiñ mynta ka don ïa ka synshar khadar kaba skhem, ki jaka treikam kiba khlaiñ. Hapoh ka jingïalam u Myntri Rangbahduh ka Ri u Narendra Modi, ka thaiñ ka la ïaid ryngkat-ryngkat bad kiwei ki bynta jong ka Ri India bad ruh ki la noh synniang shibun sha ka jingkiew shaphrang ka Ri baroh kawei” ong u Conrad.
U Secretary ka tnad Agriculture Vijay Kumar D, u la ong ba kane ka jingplie ka dei u Mawmer na ka bynta ki 3.6 lak ki longïing ki nongrep jong ka Jylla. U ong ba kane ka karkhana ha Ri-Bhoi ka lah ban kyntiew ïa ka kamai ki nongrep haduh 50% tang shi aiom da kaba khate ïa ka jingduhnong hadien ba dep ka aiom ot bad ka jingpynïasoh sha ki ïew.
