Nongpoh, Jylliew 19
Ka Myntri ba dei khmih ïa ka tnad pla tyngka ka Sorkar Pdeng, ka Nirmala Sitharaman ha ka Sngi Thohdieng ka la wan ban plie paidbah ïa ka karkhana shna musli-musla kaba heh tam jong ka Thaiñ Shatei Lam Mihngi ha Lumdaitkhla, Bhoirymbong, Ri-Bhoi District.
Kane ka karkhana kaba la biang nadong-shadong ki kor ki bor katkum kane ka juk kaba mynta la pynïaid da ka Eastern Ri-Bhoi Organic Farmer Producer Company Limited ha ka jinglut kaba T. 30 klur ïa kaba la bei tyngka lyngba ka Meghalaya Basin Management Agency (MBMA) hapoh ka FOCUS prokram bad ka International Fund for Agricultural Develop -ment (IFAD) hapoh ka Meghalaya Livelihoods and Access to Markets Project (Megha-LAMP).
Lyngba kane ka karkhana la khmih lynti ba kan ai jingmyntoi ïa ki hajar ngut ki paidbah nongrep ka thaiñ ban kyntiew ïa ka dor jong ki mar rep kum u sying, u shynrai bad u sohmrit bad la khmih lynti ruh ba kan lah ban pynmih kumba 10,000 metrik ton ki musli-musla ha ka shisnem bad ai jingmyntoi ïa kumba 5,500 ngut ki nongrep.
Ha kane ka sngi la sakhi ruh ïa ka jingïakylliang ki kot soskular sngewthuh jingmut hapdeng ka Eastern Ri-Bhoi Organic Farmer Producer Company Limited lem bad kiwei-kiwei ki kompani na ka bynta ban kyntiew bad pynïaid ïew ïa kine ki musli-musla kiba la pynmih ha kane ka karkhana.
Nalor ka Nirmala Sitharaman, ha kane ka sngi la wan ruh ban ïadon ryngkat da u Myntri Rangbah ka Jylla, u Conrad K. Sangma, u Myntri Rangbah ka Sikkim, u Prem Singh Tamang, u Symbud Myntri Rangbah ka Jylla, u Bah Prestone Tynsong nalor kiwei-kiwei ki Myntri Sorkar, ki MLA, ki heh ophisar ka Jylla, ki ophisar na ka Ri-Bhoi, ki nongmihkhmat na ki nongrep bad kiwei-kiwei de.
Haba ai jingkren ha kane ka sngi, u Conrad K. Sangma u la pynpaw ïa ka jingkmen ba ka Meghalaya ka la nang kiew ha baroh ki liang jong ki kam pynroi bad pynpaw ruh ïa ka thong jong ka Sorkar Jylla kaba la kut jingmut ban pynkhlaiñ ïa ka kam rep kam riang lyngba kiba bun sienjam kiba la shim. U la ong ruh ba ka Sorkar Jylla ka la trei shitom shi katdei ban aibor, ban pynbha bad kyntiew ïa ka rukom pynmih ïa ki mar rep bad ka ïoh ka kot ki nongrep lyngba ki rukom treikam kiba thymmai katkum kane ka juk stad kaba mynta.
U la ong ruh ba watla ka kam rep kam riang ka dei hi u budlum jong ka ïoh ka kot ki shnong kyndong ka Jylla, ka Sorkar ka phaikhmat kyrpang ban ïarap ïa ki kumno ban kyntiew ïa ka jingbha ki mar rep, ka jinglah ban pynmih kham bun bad ruh ba kin ïoh ïa ka ïew ka hat kaba biang.
U Conrad u la pynpaw ruh ïa ka jingsngew skhem ba kum kine ki sienjam yn dang lah shuh-shuh ban shim ha baroh ka Jylla ha ki por ki ban ban sa wan.
Na ka liang ka Nirmala Sitharaman ha ka jingkren jong ka, ka la ong ba ka Ri-Bhoi District ka dei kaba la shah jied kum kawei na ki Aspirational District ha ka ri bad ka la lah ban kiew shibun ha ki kam pynroi bad shen kan sa lah ban pyndep ïa ki thong kumba la thmu lashai la shisngi.
Ka la ai ruh ka jingïaroh halor ka jingjop kane ka karkhana shna musli-musla ka ban ai mynsiem bad ai jingmyntoi shi kat dei ïa ki nongrep bad kyntiew ruh ïa ka ïoh ka kot jong ka Jylla Meghalaya.
Katei ka Myntri Sorkar Pdeng ka la ai ruh ka jingïaroh sha u Conrad K. Sangma, lem bad baroh ka kynhun jong u, kiba la lah ban pyntreikam bha ïa shibun ki skhim pynroi hapoh ka Jylla bad pynpaw ruh ïa ka jingkyrmen ba ka sienjam ba ka shim kum ïa kane ka karkhana pynmih musli-musla kan pynmih shibun ki jingmyntoi ïa ki nongrep bad pynlong ruh ïa ki mar rep ba kin ïoh ban shalan ym tang hapoh ka ri, hynrei wat sha ki ïew ki hat shabar jong ka ri ruh.
