Shillong, Jylliew 19
Ka Sorkar Meghalaya ka la pynmih ïa ka hukum pynkynriah kam haba ïadei bad ka tnad pulit ka Jylla, da kaba weng noh ïa ka jingpynkynriah kam ïa u DIG, u Jerry Fiscer K. Marak ba la pynmih ha ka 12 tarik Jymmang bad ban thung pat ïa ki ophisar IPS bad MPS ba rangbah sha ki ‘Range’, ki distrik bad ki ‘Battalion’ kiba thymmai bad la ong ba kane kan treikam mardor.
Ka jingpynbna ba la pynmih ha ka Sngi Thohdieng ka ong ba ïa ka jingthmu ban pynkynriah ïa u DIG Marak na Western Range, Tura sha Eastern Range, Shillong la weng noh.
Ha ka jaka jong u, u Bah Sylvester Nongtnger, IPS, DIG (Security), Shillong, u la shah thung kum u DIG, Eastern Range, Shillong katkum ka jingai jingmut ka CSB.
Ka hukum ka wanrah ruh ïa ki jingkylla ha ka tnad CID, ki pulit ka distrik bad ki ‘Battalion Command’. U Shailendra Bamaniya, IPS, SP CID, Shillong, u la shah pynkynriah kam bad un shimti kum u SP ka East Jaiñtia Hills, Khliehriat, ha ka jaka jong u Pankaj Kumar Rasgania, IPS, uba mynta un khlieh ïa ka 3rd Battalion jong ka MLP ha Sahssein.
U Dr. Dara Aswaghosh, IPS, SP SCRB, Shillong un shimti ïa ka kam CID na u Bamaniya, katba u Ashish, IPS, SP VIS, Shillong, un kynriah noh sha ka SCRB. U Bah Nazarius Lamare, MPS, Commandant 3rd MLP Bn, Sahssein, u la shah thung kum u SP, VIS, Shillong.
Ka jingpynkynriah kam ka kner ruh sha ki kyrdan Deputy Commandant bad ki kyrdan Additional SP. U Narender, IPS, Addl. SP CBPS, Eastern Range, un shakri kum u Deputy Commandant, 6th MLP Bn, Umran, katba ka Neena Rabha, MPS, kan shimti kum ka Addl. SP, CBPS, Eastern Range.
U Anthony Ch. Momin, MPS, Addl SP ka East Garo Hills, Williamnagar, u la shah thung kum u Deputy Commandant, 4th MLP Bn, Sohpian, Nongstoiñ, katba u Krison R. Marak, MPS, un bujli ïa u kum u Addl. SP ka East Garo Hills.
Ha Ri-lum Garo, u John Clitzer A. Sangma, MPS, DSP (HQ) North Garo Hills, Resubelpara, un shimti ïa ka kam kum u DSP (HQ) East Garo Hills, Williamnagar, ha kaba un ïa bujli kam bad u Subir Sangma, MPS.
U Gobind Kumar Chetri, MPS, Assistant Commandant, 5th MLP Bn, Samanda, u la shah thung kum u Assistant Commandant, 6th MLP Bn, Umran ha ka kam kaba la lait lypa.
Baroh ki jingpynbna kin treikam naduh ka tarik ba shimti ïa ka kam lane tad haduh ban da pynmih da kiwei pat ki hukum.
