Mawkyrwat, Jylliew 19
U President ka Khasi Student’s Union (KSU), Ranikor Circle, u samla Marconi Thongni ha ka 19 tarik u Jylliew, 2026 u lah shah dung da ka tari na shadem ha ki 2 ngut ki briew kiba la shah kynnoh ba ki donkti ban thmu pynïap ïa utei u samla ha ka shnong Photkroh, Ranikor Civil Sub-Division, South West Khasi Hills District.
Katkum ka ejahar ba la ujor da u samla Marconi Thongni ha kajuh ka sngi ha Ranikor Police Station, la ong ba katei ka jingjia ka la jia ha ka por 12:30 eiei mynsngi ha kawei ka jingkieng ha ka por ba ka dang don ka jingïatrei shnong.
Shuh shuh katkum ka ejahar, la ong ba kitei ki 2 ngut, kata u Spect Syiemlieh bad u Biangsingson Syiemlieh na ka shnong Domdinar, Panchiring uba la shongkha ha ka shnong Kynrang, East Khasi Hills ki la wan ban pynkulmar shnong bad rah ruh ïa ki tiar pynmynsaw kum ka tari bad ki la thmu ban shim ïa ka jingim jong utei u nongïalam KSU da kaba dung da ka tari na shadem bad la kynnoh ba ki la pynmynsaw ruh ïa u Kitborlang Lyngkhoi.
Hadien katei ka jingjia, utei u samla u la leit sha CHC Ranikor shuwa ban leit mih hakhmat ki pulit bad katkum ka kaiphod na u doktor la ong ba ki jingmynsaw ki dei kiba sting bad ki bym donkam ban suh ksai.
Ha kaba ïadei bad katei ka jingjia, ki pulit ka Ranikor ki la pynngat mukotduma bad ka jingtohkit ka dang ïaid shakhmat.
