Shillong, Jylliew 21
Ha ka step jong ka sngi U Blei, ka 21 tarik u Jylliew 2026, ka surok ha jingkieng Umthli, ka la dkut arliang thui hadien ba ka um kaba heh ka la bam ïa ka surok.
Kane ka jingdkut katei ka surok, kadei hadien ka jingther jong u slap ba jur khlem sangeh, ha kaba ka um ka la ïaid bad ksam lyngba ka surok kaba la pynlong ïa katei ka surok ban pra bad dkut noh.
Na ka liang u Nongsaiñ Hima mar mar u la hiar sha katei ka jaka, ban tip kham bniah halor kane ka jingdkut arliang katei ka surok ha jingkieng Umthli.
Haba ïoh ban ïakren bad ki nongshong shnong ka Umthli, kiba la don ha katei ka jaka ki la ïathuh, ba ki ïoh jingtip ïa kane ka jingdkut ka surok, kadei ha ka por 7 baje eiei mynstep.
Ki la ïathuh ba kane ka jingdkur ka surok ka lah ban dei ha ki por mynstep, kaba ki kali ki dangduna ban ïaid. Ki la ïathuh ruh ba halor kane ka jingjia, ym shym la don kiba mynsaw.
Kane ka Surokbah kadei kaba dangpyntrei mynta shait shait kaba na Shillong-Pynursla-Dawki.
Haba kylli, ki paidbah nongshong ki la ong ba ka jingdkut ka surok kumne, ka ktah shibun ïa ki paidbah kiba hiar ba kiew sha Shillong, namar kadei kawei ka surok kaba ki paidbah bad ki tourist na kylleng ki ju ïaid lyngba kane ka surok.
Haba ïadei bad kane ka jingdkut ka surok, ka la mih ka jingkynnoh ba dei namar ka jingbym shimkhia ka kompani, ba ka jingtwa khyndew bad ka jingtyllun ki maw ka ju jia na ka por sha ka por ha kitei ki jaka.
Lah ban pynkynmaw ba ha kine ki bnai bad ki snem ba la dep, ka la don ka jingïabriew bad hap shapoh riat, tang na ka daw ba ka kompani kaba pyntrei ïa kane ka surok, kam shym la phikir ne ban shimkhia ban ker ïa ki bynta ka surok ki bym long ban ïaid kali bad ka jingmynsaw jong ki briew ruh, ka la jia na ka por sha ka por bad ka buh jingma ïa ki paidbah.
