Shillong, Jylliew 21
Ka Myntri tnad pla tyngka ka Sorkar Pdeng, ka Nirmala Sitharaman, ha ka Sngi Saitjaiñ, ka la ong ba ki Jylla ki dei ban tei ïa ka shlem treikam kiba khlaiñ bad ka jinglah ban pyntreikam pura khnang ban ïoh jingmyntoi na ki Externally Aided Project (EAP).
Ka la ong ruh ba ka jingkyrshan na ki ‘Consultancy’ ka dei tang ka lad btin kti kaba shipor.
Haba kren sha ki lad pathai khubor hadien ka jingïalang pynkut kaba ar sngi jong ka ‘Seminar’ halor ka “Leveraging Externally Aided Projects in the North East”, ka Sitharaman ka la jubab halor ka jingshaniah jong ki Jylla ïa ki ‘Consultant’ na ka bynta ki EAP.
“Haba phi hap ban ïoh ïa ka jingmyntoi na kum kine ki prokram, phi donkam ïa ka jinglah ban pyntreikam bha hapoh ki Jylla. Ki Jylla ki lah ban don ïa ka, ki Jylla ki lah ban ym don ïa ka, lehse da kaba tei ïa kata ka jinglah bad kumta ter-ter”, la ong ka Myntri.
Ka la ong ba ïa kane ka ‘Workshop’ la saiñdur khnang ban ïarap ïa ki Jylla ban pynkhlaiñ ïa ka jinglah jong ki ban thong ïa ki projek bad ban pyntreikam ïa ki ha ka por kaba biang khlem da ktah pat ïa ki jingpyntreikam bha ïa ka kam.
“Mynta da ka ‘Workshop’ kaba ngi la ïoh, ngi pyrshang ban ong la yn hap pynkhaiñ ne em ïa ka jinglah jong ki shlem treikam la ka long ban thong na ka bynta ki projek ne ban ïoh ïa ki projek, shisien ba la ïoh, kumno ban ïaid shakhmat ban pyntreikam hapoh ka por ba la buh bad khlem da ïapeiñ ïa ki rukom treikam bha,” ong ka Sitharaman.
Ka Myntri ka la bynrap ba ha ki bynta ba ki tnad treikam jong ka Jylla ki bit ki biang, ki Jylla ki lah ban pynïaid hi ïa ka kam. Hynrei haba don ki jingduna, ka jingkyrshan nabar ka lah ban weng shipor ïa kane ka jingeh.
“Kumta, lada ki Jylla ki don ïa ki jingdonkam, ka jinglah ki shlem treikam, hooid, lym kumta phi donkam ban don mano-mano ban btin lynti ïa phi na ka bynta katto-katne por, phi ïoh ïa kine ki jingïarap. Ha kaba kut, ngi kwah ba ki paidbah kin ïoh jingmyntoi na ki jingdon-jingem kiba bha, kiba lah ban ïarap ïa ki paidbah bad ban paw kum ka dak, nalor ki jingdon-jingem jong ka Jylla kiba dei ki jong ki paidbah,” ka la ong.
“Kumta, nga sngew ba kane ka dei ka jaka kaba ka ‘Workshop’ mynta ka sngi ka la pynleit jingmut ban ai bor ïa baroh ki Jylla,” la pynkut ka Sitharaman.
Na ka liang u Myntri Rangbah ka Jylla, u Conrad K. Sangma, uba la ai jingkren ha kane ka jingïalang, hashuwa u la kdew ba 90% na ki ‘Consultant’ kiba trei halor ki EAP ha ka Jylla mynta ki dei ki trai-ri trai-muluk kiba la shah hikai ban pynbit-pynbiang katkum ki kyndon ba ïadei bad ka pyrthei.
