Shillong, Jylliew 21
Ha ka miet 18 tarik u Jylliew, 2026, ki paidbah kiba mut hiar da ki kali na Mawmluh sha Mawshamok bad kiwei-kiwei ki thaiñ, ki la bitar lep namar ka jingshah pakhang jong ki haduh palat phra kynta, tang namar ba ki bor pulit bad ki kali khwai ki ïaleh ban tan ïa kawei ka trok damper, kaba hap ha ka jaka riat ba la tip kum ka Mawpyrkong.
Katei ka trok kaba kit mawria ha ka jingshisha, kadei kaba la hap naduh ka janmiet 16 tarik u Jylliew, 2026, bad ym shym la don mano-mano ruh ba mynsaw.
Hynrei dei ha ka 18 tarik u Jylliew, 2026, la wanrah san tylli ki kali khwai ban tan ïa katei ka trok.
Katei ka surok, kadei ruh kaba la buh jingmana da ki bor pynïaid ka Sohra Civil Sub-Division, ba ym shah ïa ki kali kit mar khia ba kin ïaid.
Kane ka pynsah lyngngoh ïa ki paidbah ba kumno kane ka trok ka rung lyngba kane ka surok kaba khim bha.
Ha ka por ba la pyrshang tan ïa katei ka trok, la pynsangeh lut ïa ka leit ka wan ki kali, kata kiba wan na thaiñ Sohra lyngba ka Mawmluh bad kiba wan na ka thaiñ Mawshamok kaba la wanrah ka jingdheng kali kaba jur.
Hynrei kitei ki kali khwai namar ka jingkhim ka surok kim shym lah ban leh eiei bad kane ka la wanrah ka jingslem kaba na ka jinglynga ka la pynlong ïa ki paidbah ban bitar.
Ha katei ka miet, ki paidbah ki la ïa ñia halor ka rukom ba ka trok damper ka lah ban ïaid ha katei ka surok watla la don ka jingmana bym shah ïaid trok ha kane ka lynti.
Kadei ruh ka jaka khlaw kaba ym don ki dukan bad ki paidbah na ka thngan, ka la poi sha ka jingkiew ing haduh khlieh bad leit ïania bad ki pulit nalor bad kiba niah kali khwai.
La ong ba la pyllait biang ïa ka leit ka wan haduh palat ka shiteng miet, kata ha ka step synñia kumba ha ka por 12 shiteng.
Kane ka rukom long ka la wanrah ka jingsngewkhia bad kyntu ïa ki bor pulit bad bor pynïaid ka Sohra Civil Sub-Division, ban shim jingkitkhlieh bad leh ïa kaba donkam, namar katei ka trok bad ki bor pulit hi ki la pyndik ïa ka leit ka wan u paidbah ha katei ka miet.
La ïoh jingtip ruh ba ka surok ha katei ka bynta, ka la shong syier namar ka trok kaba hap ka la khur lut ïa ka khyndew bad ka lah ban twa ha kano-kano ka por lada jur lei sa u slap bad la ong ba trok ruh ka dang sah ha kajuh ka jaka namar ym lah sei ïa ka na ka jingkhim ka jaka.
