Nongstoiñ, Jylliew 22
Ha ka miet jong ka 22 tarik mynta u bnai, ka Hynñiewtrep Youths’ Council (HYC) Siejlieh unit ka la ïoh ban bat ïa 9 ngut ki bar jylla kiba ïaid lyngba ka surok Siejliej bad thmu ban leit bylla sha Borsora ha South West Khasi Hills.
Ka seng hapoh ka jingïalam u General Secretary ka Siejlieh unit u samla Khrawkupar Marbaniang bad ki dkhot ki la kam ba kine ki bar jylla kiba wan na ri thor kim shym don kino-kino ki kot jingpynshisha haba ïadei bad ka laisen bylla na ka KHADC bad ruh na ka tnad Labour.
Shuh shuh ki la ïathuh ruh ba hadien ba ka seng kala bat bad hadien ba la tohkit ka la pynphai noh ïa ki, ba kin leit sha la ka jaka na kaba ki wan.
“Ka seng kala kren shai ba kam kwah ïa ki bar jylla ba kin wan bylla ha ri lum jong ngi, namar haba wan kiba nabar, ka knieh ïa kamai kajih ki trai ri trai muluk bad ruh ka pynjaboh ïa ka mariang,” kam ki nongïalam HYC.
Ki nongïalam ka HYC ki la ong ruh ba ka seng ka kyntu ïa ki trai ri kiba dei ki nongaikam bad nongseng kam ba kin pyrkhat thymmai noh ban peit noh ïa la ki briew kiba dei ki trai ri trai muluk ba kin ai kam.
Shuh shuh ki la bynrap ruh ba ka jingai kam ïa ki trai ri trai muluk ka kyntiew ïa ka ïoh ka kot ka Jylla khamtam lei ha kum kine ki por ba ka kamai kajih ka hiar bha.
