Shillong, Jylliew 22
Ka Laban Presbyterian Higher Secondary School, Shillong ha ka 22 tarik u Jylliew 2026 ka la rakhe ïa ka jingdap 185 snem ka jingwan poi u “Kpa Ki Dak Thoh Khasi”, u Rev. Thomas Jones sha ka Ri Khasi.
Kum ka dak jong ka jingkynmaw ieit bad leh burom ïa u, ka skul ka la pynlong ïa ka “Popular Talk” halor u Rev. Thomas Jones haba ka kongsan ha kane ka sngi ka dei ka Dr. Ailynti Nongbri, Principal, Thomas Jones Synod College Jowai, kaba long ruh mynshuwa ka Associate Professor & Ex-HOD, Khasi ka Shillong College, ka la long ruh ka nongkren halor ka jinglong jingim jong une u riewkhraw pyrkhat.
Ha kane ka sngi la ïadon ryngkat da ki dkhot ka Managing Committee jong ka Skul, Principal, Vice Principal, Head Teacher, ki Nonghikai bad khamtam ki khynnah jong ka skul.
Ka Dr. Ailynti Nongbri ha ka jingkren jong ka, ka la batai shaphang ka histori ka jingwan poi u Rev. Thomas Jones ha ka 22 tarik Jylliew 1841 bad ka jingtrei jong u da kaba ka la ong ba u la wan ha ka dur jong ka “Mission with a Vision”. Ka la banjur halor ka mat ba “lada ma ngi ki Jaidbynriew “Khynriam u Pnar u Bhoi u War “ngi sngew sarong halor ka jingïatylli jong ngi lyngba ka jingpyndonkam ïa ki juh ki dak thoh ki jong ngi, ka burom ka leit sha u Thomas Jones.”
Ka la kyntu kynpham ruh ïa ki nonghikai ba kin bud ïa ki nuksa kiba kynsai ki jong u ban hikai da ka jingieit bad ban len ïalade ha ki por ba donkam. Ka la pynpaw ruh ïa ka jingithuh ka Sorkar ïa ka ktien Khasi kum ka ‘Official Language’ ne ka ktien Sorkar ha ka Jylla Meghalaya, ka burom baroh ka dei sha u Rev. Thomas Jones uba la ai ïa ki dak thoh.
Ka la pynkut ïa ka jingkren jong ka da kaba ong ba u Thomas Jones u la bet ïa u symbai u bymsep bad ka nong jong kata ka long na ka jinglongrit u la kylla long u Akhia bad u la kohnguh ïa ka jingkynpham jong u Blei ba “U la jied ïa u ban pynshai ïa ka Rilum Khasi”.
Ha shuwa ïa kane ka sngi, ka Skul ka la pynlong ïa ka jingïakop kum ka “Poster Competition” bad thoh “Essay Competition” hapdeng ki khynnah skul halor ka phangpdeng “Thomas Jones: U Nongïalam lynti sha ka jingnang jingstad”.
