Nongstoiñ, Jylliew 22
Ka skul Thomas Jones Secondary Pyndengrei ha ka sngi Nyngkong kala ïoh ban plie ïa u mawnongrim na ka bynta ban plie noh ïa ka Higher Secondary jong ka skul ha kaba la wan ban plie da u MLA ka Nongstoiñ Bah Gabriel Wahlang.
Ha ka jingplie ïa u mawnongrim na ka bynta ka Higher Secondary jong ka Thomas Jones ka long ruh kum shi bynta ban rakhe ïa ka sngi ba kyrpang jong u Thomas Jones uba long u kpa ki dak thoh alphabet Khasi.
U Bah Gabriel Wahlang haba kren kum u kongsan ha kane ka sngi u la ong, ka Sorkar kala ïaleh katba lah ban leh bha ïa baroh ki skul bad u la ong ruh ba ha kaba ïadei bad ki Adhoc Grant kala kham eh mynta namar ba ka Sorkar ka dang pynkhreh ban pynbeit ïa ki kynrum kynram hapoh ka tnad pule puthi ban pynbha ïa ka Education Policy bad hangta yn sa lah ban sdang biang ïa ki Adhoc grant.
Haba kren halor ka sngi u Thomas Jones, u Bah Gabriel u la ong, “U Thomas Jones u wan sha ka Ri Khasi ban pynïatylli ïa ngi lyngba ka jingpynïoh ïa ngi ïa u dak thoh alphabet bad ïa ka ktien Khasi.”
Shuh shuh u Bah Gabriel ha kaba ïadei bad ka jingplie ïa ka Higher Secondary, u la kular ban ai jingïarap pisa na ka MLA skhim.
Ha katei ka jingïalang plie ïa u mawnongrim la sakhi da ka jingïadonlang ruh u Tbn C. Rani, Tbn T. Lyngdoh, Kong B. Marweiñ Principal, ki dkhot ka managing committee jong ka skul, ki nonghikai, ki khynnah skul, ki kmie ki kpa bad kiwei-kiwei.
