Shillong, Jylliew 22
Ka kynhun ki pulit ka Anti-Narcotics Task Force (ANTF) ha ka sngi Nyngkong kala pynlong ïa ka jingkhynra pyrshah ïa ki nongkhaïi drok ha Lumsurvey, Shillong bad ha kaba la ïoh ban kem noh ïa arngut ki nongkhaïi drok nalor ka jingïoh kurup ïa u heroin bad drok paraphernalia.
Kane ka jingkhynra, ka dei kaba la pynlong hadien ka jingïoh ïa ka jingtip kaba bniah, ha kaba ki ANTF ki la hiar sha Lumsurvey bad ban kem noh ïa ki ar ngut ki briew ba la kynnoh donkti ha kane ka kam khaïi drok.
Ka jingkhynra la pynlong katkum ki kyndon ka NDPS Act kaba la lam sha ka jingïoh kurup jong kawei ka synduk plastik ba buh sabon, ba la thep ïa u suba heroin uba don ka jingkhia kumba 16.1 gram, 47 tylli ki vials ba la thep ïa u suba heroin, bad kawei ka mobile phone.
Ki arngut kiba la shah kem ki kyrteng ka Sabina Begum ba 21 snem, kaba dei ka kurim jong u Omega Ali, kaba sah ha Lumsurvey bad ba dei trai shnong na Tezpur ha Assam, lem bad u Viru Singh, 40 snem uba sah ha Them Metor.
Katkum ka jingïathuh u Superintendent of Police ka ANTF, Meghalaya, Vikash Kumar, IPS, kine ki arngut la suba ba ki dei shibynta jong ka Syndicate ba treikam ha Shillong bad ba pynïaid ïew ïa u drok.
U pyntip ba tang hapoh u 2026, ka ANTF kala register haduh 3 tylli ki case NDPS ba khaïi drok tang na Lumsurvey bad haduh 7 ngut ki briew la ïoh ban kem, ha kaba bun na kine ki briew ki dei kiba na Assam.
Ha kaba ïadei bad kane ka kam, la dep ban register ïa ka case ha thanad Sadar, Shillong hapoh ka NDPS Act.
Shuh shuh katkum ka jingthoh jong ka ANTF la pyni bad kdew ba ka Lumsurvey ka la kylla long ka jaka pdeng jong ka jingkhaïi ïa ki jingdih buaid ha une u snem.
