Shillong, Jylliew 22
U Myntri Rangbah ka Jylla, u Conrad K. Sangma, ha ka Sngi U Blei, u la kyrpad ïa ka jingtuklar jong u Myntri ka tnad kam ïada ri, u Rajnath Singh, haba ïadei bad katto-katne ki projek jingtei ba kongsan kiba donkam ïa ka jingïatreilang jong ka tnad ïada ri.
U Conrad u la ïakren bad u Rajnath hadien ba la dep leh ïa ka ‘Yoga’ ha ka jaka treikam jong ka Eastern Air Command.
U Conrad u la pynshai ha u Myntri halor ka jingthmu ban pynheh ïa ka Kad Liengsuiñ jong ka Shillong bad ban shna ïa ka ‘Four-Lane’ na ka bynta ka surok Shillong-Barik Point.
U la pynshai ruh sha u Rajnath halor ka jingtyrwa jong ka jingpynïasoh surok hapdeng ka Ranikor bad Ratacherra ha shilynter khappud ka India bad Bangladesh.
U Myntri Rangbah ka Jylla u la kyntu ruh ïa u Rajnath ban pynbna ïa ka surok Ranikor bad Ratacherra kum ka surok kaba kongsan, da kaba kdew ïa ka jingdonkam jong ki na ka bynta ka jingshngaiñ ka ri bad ka roi ka par ha ka thaiñ. Haba pynpaw ba la dep ban ïaid shakhmat bad ka jingpynïasoh surok na Ranikor sha Dalu ha ki kylla bapher-bapher-da kaba pynïasoh ïa ka NH- 217 bad NH-127B lyngba ka jingkieng Phulbari-Dhubri sha Silchar, Assam, hynrei u la ong ba ka bynta jong ka Ratacherra-Ranikor ka dang sah khlem pat leh eiei.
U Myntri Rangbah u la ïathuh ba ka Sorkar Jylla ka la ïakren ruh bad u Myntri Sorkar Pdeng ka tnad Road Transport & Highways, u Nitin Gadkari halor ka jingthmu ban pynïasoh ïa ka surok hapdeng ka Ranikor bad Ratacherra ha shi lynter khappud ka India bad Bangladesh.
Katkum ka jingong jong u Conrad, u Gadkari u la pynpaw ïa ka jingdonkam jong ka jingkyrshan jong ka tnad ïada ri haba ïadei bad kane ka projek.
“Lada mynjur, kane ka surok ba kongsan ba la tyrwa, la khmih lynti ba kan pynbha ïa ki lad pynïasoh ha shi lynter u pud u sam bar-ri jong ka Meghalaya bad kan long kum ka bynta kaba kongsan na ka bynta ka Thaiñ Shatei Lam Mihngi,” ong u Myntri Rangbah ka Jylla.
