Shillong, Jylliew 22
Ki nongtrei Muster Roll ba kynthup na ka tnad Public Health Engineering (PHE) bad Public Works Department (PWD) ki la pynpaw ïa ka jingkynduh jingeh jong ki namar ba ki khlem ïoh tulop mynta la lai bnai bad kyntu ruh ïa ka Sorkar ba kan pynkloi noh ban pynllait ïa ka tulop jong ki.
Ïa kane la pynpaw da u Bah Nazrius K Lanong General Secretary ka All Meghalaya Muster Roll Progressive Workers Union ha ka jingïakren sha ki nongthoh khubor hadien ba wai ka jingïalang pynkha Unit ba thymmai bad jied nongkitkam kaba la long ha Khasi National Dorbar Hall, Shillong ha ka lah Sngi u Blei.
Shuh-shuh u la ïathuh ba ki nongtrei Muster Roll kiba dei jong ka PWD Road ki khlem ïoh tulop naduh u bnai Lber, Ïaïong, Jymmang, katba kiba dei na ka PHE ki khlem ïoh tulop mynta la kumba arbnai tam, ha kaba u la kdew ba ki la ïakynduh jingeh shibun khamtam lei ba ki mar ki mata ki la kiew dor lut. Kumta u la kyntu bad buh ka jingkyrpad ïa ka Sorkar Jylla ba kan shimkhia bad ba kan ïaleh katba lah ban pyllait noh kloi ïa ka tulop ba sah jong ki.
Ha kane ka sngi ka AMMRPWU ka la pynkha ïa ka shnat treikam jong ka Shillong Unit bad jied ïa ki nongïalam jong ka na ka bynta ka samoi treikam ba lai snem kynthih, ïa kaba la bynshet ïa ka kam President ïa u Bah Dondor M Syiem, Vice President Bah Bankerlang Kharngi, General Secretary Bah Hercules Sawian, Ast General Secretary Kong Mery Ani Nongkynrih, Treasurer Kong Rida Nongsiej bad Ast Treasurer Kong Wanda Majaw ïa kaba u Bah Nazarius u la shim ïa ka bynta ban pynskhem ïa kine nongkitkam jong ka Shillong Unit.
