Shillong, Jylliew 22
U nongïalam ka Liang ïatei ha Khasi Hills Autonomous District Council (KHADC) u Bah Titosstarwell Chyne u la pynpaw ka jingpyrshah halor ka jingleh ka Executive Committee (EC) ban weng noh ïa ka Section-16 jong ka Land Act.
Haba kren sha ki nongthoh khubor ha ka Sngi Nyngkong u la ong ba u kyrshan ïa ka Land Ceiling ba la leh ka EC, hynrei ha ka Section-16, ka kren shai ba haba leh ïa kane donkam ban ïamir jingmut bad ki kynhun bapher-bapher khamtam na ka liang ki Shnong ki Raid bad ki Hima, hynrei ym tip na kaei ka daw ba ka EC ka la pynmih ïa kane ka jingpynbna.
Haba ïadei ka Dulir khyndew u Bah Titosstarwell u la ong ba ban pynskhem shuh shuh ïa ka dulir khyndew lyngba kane ka aiñ u la kyntu ïa ki paidbah ba kin leit ‘Register’ hapoh ka District Council khnang ba kin ïoh ïa kata ka syrnot jingpynshisha bad ka hok bat khyndew jong ki.
