Shillong, Jylliew 22
U Bah Prestone Tynsong, Symbud Myntri Rangbah ka Jylla, uba dei ruh u nongmihkhmat ka Pynursla Konstitwensi u la ong ba ka surok kaba la dkut arliang ha jingkieng Umthli, ka la don shisha ka jingeh kaba jur bha bad kan sa shimpor ruh ban shna pynbha ïa ka.
“Ngin sa shong ka jingïalang bad ki ophisar baroh, na ka liang ka District Administration, NHIDCL, PWD ban pynbeit kumno ban pynbeit bad leh ïa kane ka kam,” la ong u Bah Prestone haba kren sha ki lad pathai khubor hadien ba la dep ban jurip ïa ka surok kaba la dkut ar liang.
Ha kane ka sngi jurip u Bah Prestone ïa katei ka surok la ïadonlang ruh u Bah Vivek Syiem, Superintendent of Police (SP) ka East Khasi Hills District, u Deputy Commissioner (DC) ka EKH, u Abhilash Baranwal, ki heh ka NHIDCL, ki engineer, bad kiwei-kiwei.
U Bah Prestone u la leit jurip hadien shi sngi ka jingkdut katei ka surok, kaba la jia ha ka step jong ka sngi U Blei hadien ka jingther u lapbah ha kitei ki thaiñ.
U Bah Prestone u la ong ba “Mynta ka sngi ngi la jurip ïa ka surok ba ïoh lehse kan don ki lad ki lynti ban phah ïaid ïa ki kali, kiba leit sha Pynursla ne sha Dawki. Da kaba bynrap “Ngi lah ban phah ïaid noh ïa ki kali na ka surok Umthli, Iew Mawïong bad Nongthymmai, ka ban poi beit-beit sha ka parmaw u Bah Khrik.”
“Ngi ïohi ïa ka jingeh kaba jur bha haba ïadei bad ka jingtwa, te kan bam bha ka por ruh ban pynbha ïa kane,” u la bynrap biang.
“Imat ngi hap pynïaid nangne na Umthli, na Iew Mawïong bad kumjuh na Nongthymmai, ban mih sha parmaw jong Bah Khrik. Ngi la ïaid myntan bad nga ïohi ka long biang bad shipor ngin sa phah ïaid na kitei ki jaka, tangba kan dei tang ïa ki kali rit, ym shah pat ki kali kit mar,” la ong u Bah Prestone.
Namarkata, u la ong “Ngin pynbeit ruh bad ki bor shnong bad ki trai shimet ruh, ba ngin kyrpad ban ailad ïa ngi ban pyndonkam ïa ka surok, kat bym pat lah ban pyndep ïa ka jingtei ba thymmai ïa kane ka surok, khamtam namar ba ka surok ka la dkut syndon.”
