Shillong, Jylliew 22
Ka Sorkar kala pynmih ïa ka jingbthah ïa baroh ki nongshong shnong jong ki shnong kiba hap hapoh ka Pynursla C&RD Block, ba kin nym ïaid lyngba, rung lane ïalum paidbah ha ki jaka ba jia ka jinghap maw bad jingtwa khyndew.
Katkum ka jingpynbna bala pynmih da Block Development Officer ka Pynursla Block Dr. L Kharmon, la ong ba kine ki jaka ki dang long kiba ma bad ki lah ban wanrah ïa ki jingma kiba khraw ïa ka jingim bad jingshngaiñ jong ki paidbah.
La bthah ba kum ki nongshong shnong ki dei ban kiar na ki jaka ba don jingma bad bud ryntih ïa ki jingbthah jong ki bor synshar bad ym dei ban pynkheiñ ïa ki dak ki jingmaham, ki jingïada lane ki jaka ba la khang paidbah.
La bthah ruh ban peitngor ba ki khynnah, ki tymmen bad ki jingri kim dei ban leit tur sha ki jaka ba la buh jingmaham bad ruh ba dei ban pyntip mar mar sha ki bor ba dei peit lada lap kino-kino ki dak jong ka jingkhih khyndew, jinghap maw ne kiwei pat ki jingma.
Dei ban kiar ban ïaid lyngba na ka surok Laitlyngkot-Lyngkyrdem bad la bthah ban ïaid lyngba ka surok Pynursla-Dawki-Amlarem lane ka surok Pynursla-Nongjri-Sohra na ka bynta ka jingshngaiñ.
Ïa kane ka jingpynbna la pynmih na ka bynta ka jingshngaiñ jong ki paidbah baroh. Ka jingïatreilang ka jong ki paidbah ka long kaba donkam ban lait na kino-kino ki jingjia ba sngewsih bad ban ïada ïa ka jingim jong baroh.
