Shillong, Jylliew 22
Ki jingpyrshang jong ka Meghalaya ban pynwandur thymmai ha ka jingsumar ïa ki khyllung ka la ïoh ïa ka jingithuh na ka ri, ha kaba ka Meghalaya Early Childhood Development Mission (MECDM) ka la ïoh ïa ka khusnam ‘Gold SKOCH’ ha ka thup kyrdan ‘Early Childhood Development’ (ECD) ha ka ‘SKOCH Summit Public Policy Forum’ kaba 108 kaba la long ha New Delhi.
Kane ka khusnam, kaba la ai ha ka ‘PHD Chamber of Commerce and Industry’ ha ka jingïalang halor ka ‘Regulatory Framework for Viksit Bharat’, ka buh ïa ka Meghalaya hapdeng ki nonglam lynti ba hakhmat eh (ka ri) ha ka tnad ‘Social Sector Innovation’ bad ka synshar-khadar.
Kane ka long kum ka dak ka jingburom ïa ka jingtrei jong ka Jylla ha ka ban tei ïa ka rukom treikam kaba ïatreilang, kaba kynthup ïa bun ki tnad kiba pynleit jingmut ha ki snem ba nyngkong jong ka jingim i khyllung. Ka mishon ka la mynjur ruh ïa ka jingkhmih bniah kaba la sdang ha u bnai Lber, 2026.
Ha ki katto-katne bnai, la jied ïa ka na ki sienjam ha kylleng ka ri bad la khmih bniah lyngba ka jingpyni ïa ki projek, ka jingthep ‘vote’ paidbah, ki jingbishar bniah na ka kynhun ki ‘riew shemphang, ka jinglum thup ïa kot ki sla, ki dur ki dar, ki dur-khih bad ka jingkhmih bniah ïa ki jingmih.
Ka kynhun bishar jong ka SKOCH ka la pynpaw ïa ka jinglah jong ka Meghalaya ban ïaid shakhmat na ka jingai jingshakri kaba kongsan da kaba thaw ïa ka basa-jingim ha ka Jylla baroh kawei kaba pynshong nongrim ha ka jinglong trai ha ka imlang-sahlang, ka jingsumar kaba shimkhia, ka bam ka dih kaba tei, ka jinghikai naduh dang rit bad ka jingkylla ha ka jinglong.
Ha ryngkat ka jingkyrshan ka tnad Social Welfare, ka ECD Mission ka la wanrah lang ïa ki tnad treikam – ka koit ka khiah, pule-puthi bad ka Community & Rural Development lem bad ka MSRLS, SRES, ki paralok ha ka liang ki kam pynroi, ki kynhun niam, ki shlem treikam ha ka imlang-sahlang bad ki nongtrei ba hakhmat eh.
Ki nongbishar ki la kdew ïa ka jingpynïasoh jong ka ECD hapoh ki rynsan jong ki SHG, ka jingïadon bynta lang jong ki kynhun niam ha ka kyrdan jong ka imlang-sahlang, ka ‘Music and Movement Programme’ na ka bynta ka jingai mynsiem, bad ka jingpynleit jingmut kaba khlaiñ ïa ka ‘Gender Equality and Social Inclusion’ kum ki bynta kiba kham paw.
Ki ophisar ki la ong ba kane ka ‘Gold Award’ ka dei ka jingithuh ïa ki kam ba la leh haduh mynta bad ka jingpynskhem biang ïa ka jingkular ka Jylla ban pyntikna ba iwei-pa-iwei i khyllung i ïoh ïa ka jingsumar, ka bam ka dih kaba tei, ka jingpynshlur bad jingïada kaba biang na ka bynta ka jingsdang kaba skhem ha ka jingim.
Ka mishon ka la pynpaw ba kan dang bteng ban pynkhlaiñ ïa ki jingïatreilang bad ban pynïar ïa ki buit treikam thymmai ban poi sha kiba bun ki longïing ha kylleng ka Meghalaya.
Ïa kane ka khusnam la pdiang da ka kynhun jong ka Jylla kaba la ïalam da u Bah Ronald Kynta, Chief Operating Officer ka Meghalaya ECD Mission ha ryngkat ka Program Manager, ka Kong Nayna Warjri bad u Civil Engineer, Bah Meaibor Hiam Roy M. Pdah.
