Shillong, Jylliew 22
Kum shibynta ban kynmaw ïa ka sngi jong ka jingwan ïuh kjat u Rev. Thomas Jones ha Ri Khasi-Jaiñtia, ka Khasi Jaiñtia Welfare Assocation (KJWA) ha ka 20 tarik u Jylliew 2026, ka la pynlong ïa ka lympung ïa phylliew jingmut ha Khasi National Dorbar Hall, Mawkhar.
Ha kane ka sngi u Rev. Dr. OL Snaitang u la long kum u Kongsan ha katei ka sngi ban ïa phylliew jingmut.
U Dr. OL Snaitang haba ai jingkren u la kren halor ki san tylli ki bynta bad kawei na ki ka long, ïa ka jingtrei jong u Thomas Jones na ka bynta ka ri bad ka jaidbynriew Khasi-Jaiñtia.
“Watla nga long tang u riew paidbah hynrei nga la ïoh ban ai jingkren ïa u Thomas Jones ha Synod College ha ka paper, nga la ïoh ban kren ruh ha Sankardev College, ha USTM ruh, ha Ri-Bhoi College,” u la ïathuh.
U la ong ruh ba u Thomas Jones u la wan poi ha ri Khasi ha Saitsohpen ha ka 22 tarik u Jylliew 1841, bad ka jingwan u Thomas Jones mynta ka la palat ïa ka 150 snem tam.
“Une u Thomas Jones ynda haba u poi ha ri Khasi-Jaiñtia, u lap ba ngim don ïa ki dak thoh, ngim don ïa ka tien pdeng. Kumta da ka jingïarap lang da ki missionary ha kato ka por, u Thomas Jones u la lah ban pynkylla ha ka ktien Khasi ïa ka dak thoh ABKD,” la ong u Dr. OL Snaitang. U la ong ruh ba u Thomas Jones um wan ban bteng hynrei u wan ban thaw bad ban sdang thymmai, watla kito ki skul kiba la ieh khongreng ha Mawsmai, Mawmluh bad ha Sohra. Kumta u la wan ban sdang thymmai.
“Ha ka jingwan sdang thymmai u Thomas Jones u lap ba ki Khasi kim don ïa ki dak thoh, te u la wanlam da Roman Alphabet, hynrei nga kwah ban ïathuh ïaphi ba ki Roman Alphabet ki don tang khyndiat tylli, ki dak Bengali ki don haduh 50 tam tylli ki Alphabet bad ki Khasi lada pule ngim lah. Hynrei haba u Thomas Jones u la wanrah ïa kine ki Alphabet pat, haba wan kai ki briew ha ïing u hikai ban pyni ïa ki dak thoh ABKD ter ter,” la ong u Rev.Dr. OL Snaitang. U la ïathuh ruh ba hadien ba u la pynithuh ïa kine ki dak thoh pat, u Thomas Jones u la sdang sa ki kynja jingïaseng bad kine ki kynja jingïaseng ki long ruh kum ki skul bad nangta pat u la sdang ban pynkylla ne translate ïa ki kot, kaba kawei kaba u la dep pynkylla kadei na ka Gospel U Mathaios bad kiwei-kiwei de ki jingpynkylla.
Hadien kane ka jingai jinghikai kiba long kum ki skul, ki la mih kiba tbit ban ïalam ïa ki jingïaseng.
Nalorkata, u la kdew ruh ba u Thomas u la wan ban buh pynithuh ïa kine ki dak Roman hynrei mynta ngin ong noh ki dak Khasi, kine ki dak Khasi kiba u la pynkylla, u la pynïeng ha ki skul bad kine ki la long ki nongrim. da kaba bynrap ruh ban ong “Te kadaw balei ba u Thomas Jones u shim ïa ka ktien Sohra kadei namar ba kadei ka ktien kaba kren ha Mission Compound”.
