Shillong, Jylliew 22
U President ka Jaiñtia Coal Owners, Miners and Suppliers Workers Association u Bah Marshal Biam mynta ka sngi ka 22 tarik u bnai Jylliew 2026 u la rai ban sangeh shah thngan hadien 22 sngi.
Kane ka jingshim rai ka dei ha ka jingïalang paidbah ha kaba ka seng ruh ka la rai ban pynsangeh shuwa shipor ïa ka jingshah thngan bad ban pyrkhat da kawei pat ka lynti ban pyrshah ïa ka Sorkar.
Ha katei ka jingïalang la ïoh ïa ka jingkren na u President ka JCOMSWA u Bah Marshal Biam uba la pynpaw ïa ka jingsngewnguh ïa ka jingwan kyrshan ki paidbah ha ki 16 sngi kiba la dep, kaba u la shong shah thngan khlem buh por ban pyrshah ïa ka Sorkar ban dawa plie noh ïa ka kam tih dewiong hapoh ka Jylla. U la ong ba bun napdeng ki nongwan ai ka jingkyrshan kim i don jingkyrmen shuh ba un im.
Na ka liang u nongaiktien ka MCTODA u Bah Wanshwa Nongtdu u la pynpaw ïa ka jingsngewkhia halor kane ka jingïakhih ka kynhun ban pyrshah ïa ka Sorkar bad ong ba u dei u nongïalam uba ïaleh na ka bynta u paidbah.
Shuh-shuh la ïoh ka jingkren na u Chairman u Bah Overcome Dkhar, ka Kong Jhanika Siangshai, u Bah Hamjngai Tang na ka shnong Sahsniang West Jaiñtia lem bad kiwei-kiwei. Ka kynhun ka la kyntu ïa ka Sorkar ban jubab ïa ki jingdawa bad lada kam sngap ka kynhun kam banse ban pynjur ka jingïakhih.
