Shillong, Jylliew 22
U Myntri ka tnad General Administration, Bah Sosthenes Sohtun ha ka Lah Sngi U Blei u la ong ba ka Sorkar Meghalaya kan sa tei ïa ka Meghalaya House ka bathymmai ha Vellore ban pynbiang ïa ka jingdonkam namar ka jingnang bun jong ki nongpang (na kane ka Jylla) kiba leit phah sumar sha CMC Vellore.
Kane ka long hadien ka jingjurip ïa katei ka jaka kaba la don lypa.
U Myntri ha ryngkat ka jingsynran lang u Commissioner & Secretary, OSD bad nongtrei jong ka Meghalaya House Vellore, ki la pynlong ïa ka jingjurip ha katei ka jaka bad u la pynïaid ïa ka jingïalang khmih bniah ban bishar ïa ka jinglong-jingman jong ka jingtei kumjuh ban saiñdur na ka bytna ki jingdonkam hadien-habud.
“Ngi la pynlong ïa ka jingjurip bad pynïaid ïa ka jingïalang khmih bniah ban shim ïa ki rai ha kaba ïadei bad ka jinglong-jingman jong ka Meghalaya House ha Vellore,” la ong u Bah Sosthenes.
Haba batai ïa ka jingtei kaba mynta kum ka “ïingmala kaba la rim bha” kaba don kumba 13 tylli ki kamra, u Myntri u la ong ba ka la shakri ïa ki nongpang na Meghalaya kiba leit sha CMC Vellore ban ïoh ïa ka jingsumar ba kyrpang la bun-bun snem mynta.
Haba kdew ïa ka jingkiew suki-suki ha ka jingdon ki nongpang, u la ong, “Ka jingdon ki nongpang ka la nang kiew man la u snem. Tang ha u snem 2025, ngi la tam palat ïa 212 ngut ki nongpang,” bad bynrap ba ki nongpang bad ki nongsynran ki la pynpaw ïa ka jingsngewkmen halor ka jaka sah bad ka jingshakri. U Bah Sosthenes u la ai khublei ruh ïa ki lad jingkyrshan jong ka Sorkar Jylla.
“Nga ai khublei ïa u Myntri Rangbah ka Jylla, u Conrad K. Sangma bad ka Sorkar Meghalaya kiba la pynbiang ïa ka leit ka wan ba khlem jingsiew sha ki nongpang. Ngi la buh ïa ki kali ban kit ïa ki nongpang sha bad na ‘Hospital’ ha ka por mynstep bad janmiet na ka bynta ka jingsumar. Kane ka la ïarap pynduna shi kat dei ha ka leit ka wan,” u la ong.
Da kaba kdew ïa ka kaiphod ba dang shen jong ki enjiniar ka PWD, u Myntri u la ong ba ka jinglong-jingman jong ka ïingmala ka la nang sniew nang sniew.
“Katkum ka kaiphod jong u enjiniar ka PWD, ka jinglong-jingman jong ka ïingmala hangne ha Meghalaya House, Vellore ka long kaba sniew shaba palat, bad ngi dei ban shim ïa ka rai,” ong u Bah Sosthenes.
Kum ka sienjam kaba kyrkieh, ka Sorkar kan pynkynriah noh ïa ki nongpang sha ka ‘Guest House’ ba la shim wai naduh u bnai ban wan.
“Ngin shim wai ïa ka ‘Guest House’ kaba thymmai ban pynsah ïa ki nongpang kiba wan na Shillong ban shah sumar ha CMC Vellore, bad naduh u bnai ban wan, ngin sa pynkynriah ïa ki shata,” u la ong.
Na ka bynta ka jingpynbeit ka ban neh slem, ka Sorkar ka thmu ban shna ïa ka Meghalaya House ka bathymmai bad kaba lah ban pynheh.
“Ryngkat bad ka jingpynkynriah nongpang, ngi la rai ruh ban tei ïa ka Meghalaya House kaba thymmai ha Vellore. Ngi dang pan jingkyrshan bad jingmynjur na ka tnad Planning bad Pla Tyngka na ka bynta ban tei ïa kane ka ïingmala bathymmai,” ong u Myntri.
U la bynrap ba kane ka jaka thymmai kan kyntiew shi kat dei ïa ka jinglah ban ban pdiang bad jingtreikam jong ka.
“Kumba ka long mynta, ngi don haduh 13 tylli ki kamra ba treikam. Kane ka ïingmala bathymmai kan pynbun sa da ar ne lai shah ha ka jingdon ki kamra khnang ba ngin lah ban pdiang kham bun ki nongpang bad ki nongsynran ba wan lang bad ki ha Meghalaya House Vellore,” la ong u Bah Sosthenes.
