Nongpoh, Jylliew 23
Da ka jingsngewkhia halor ka jingsahteng ban pyndep ïa ka skhim Jal Jeevan Mission (JJM) ha ka thaiñ Baridua, ka Federation of Khasi Jaiñtia & Garo People (FKJGP), Them Marwet Circle ha ka sngi Ba-ar kala leit ban kynduh ïa u Executive Engineer ka tnad PHE ban ïakren halor katei ka mat.
Haba ïakren hadien ka jingkynduh bad u Bah U Kurbah, EE ka PHE Nongpoh Division, u Bah Allan Donald Sohpdang, General Secretary ka seng ha ka jingdon lang u Bah Denis Nongrum lem bad kiwei de ki dkhot, u la ong ba ka seng ka dap da ka jingsngewkhia kaba jur naba ki projek JJM ha kiba bun tylli ki shnong ka thaiñ ki dang sahteng bad khlem lah ban pyndep haduh mynta naduh ba la sdang ban pyntrei ha u snem 2023.
U la ong ruh ba ka jingbym lah ban pyndep ïa katei ka skhim, khamtam ban pynpoi um ha manla ki thliew ïing, kala pynlong ïa ki ba bun ki nongshong shnong ban pynpaw ïa ka jingbymhun ka jong ki bad buh ruh ïa ki hapdeng ka jingeh kaba khraw halor kane ka jingpynsahteng ban pyndep ïa kane ka projek kaba ki la angnud ba kan ai jingmyntoi bad pynsuk shikatdei ïa ki kumba la mang da ka Sorkar Pdeng.
Kumta na ka liang ka seng ka buh ïa ka jingkyntu sha ka tnad PHE ba ka dei ban shimkhia mardor ban pynsted ïa ki kam kiba dang sahteng kumba la mang kyrpang da ka Sorkar khnang ba kan long ka jingmyntoi ïa ki paidbah nongshong shnong ba kin ïoh ïa ka umbam umdih kaba paka.
Shuh shuh, u Bah Sohpdang u la ïathuh ruh ba ka tnad PHE lyngba u EE ka PHE Nongpoh Division, kala kular ban shimkhia bad leh ïa kaba donkam ban pyndep noh ïa katei ka skhim kaba dang sahteng bad pyntip ruh ba na ka liang ka seng kan dang ïai buddien bad peitngor ba katei ka kam yn lah ban pyndep khnang ba kan long ka jingmyntoi ïa ki paidbah nongshong shnong ka thaiñ hi baroh.
