Mawkyrwat, Jylliew 23
Kawei ka jaka buh ïa u Transformer kaba don ha ka shnong Mawkyrwat ha South West Khasi Hills District ka la kylla long kum ka pung dohkha ha kaba ka um ka la dap ha kane ka jaka bad tap ruh ïa u Transformer bad pynlong ban don ka jingbthei kaba man ka por ha kane ka jaka.
Katkum ka jingïathuh uwei u nongshong shnong uba sah marjan, u la ïathuh ba ha ka sngi ka 22 tarik u Jylliew ha ka por kumba 9 baje eiei mynmiet katba u dang ïaid lynti da ka kali u la ïohi ba ka don ka jingbthei kaba jur bha ha une u Transformer kaba la pynher syrngiew ïa ki paidbah nongïaid nongïeng bad kiba sah marjan.
Na ka liang ka Seng Samla Shnong Mawkyrwat hapoh ka jingïalam u Bah Kitborsing Lyngdoh ki la leit ban jurip biang ïa une u Transformer bad lap ba ka don ruh ka jingtuid jong ka um napoh une u Transformer sha surok kaba lah ban buh jingma ïa ki paidbah khamtam ki khynnah skul kiba ju ïaid lynti na kane ka jaka.
U Bah Kitborsing Lyngdoh u la ïathuh ruh ba na ka liang ka shnong Mawkyrwat naduh u bnai Jymmang jong u snem ki la leit ban buh jingthoh hapoh ophis MePDCL na ka bynta ban phah maramot kyrkieh noh ïa kane ka jaka hynrei kaba sngewsih ka long ba na ka ophis ki la shu wan jurip hynrei kim shym la leh eiei haduh mynta.
Kumta na ka liang ka Seng Samla Shnong Mawkyrwat ka buh jingkyrpad biang sa shisien ïa ka tnad MePDCL Mawkyrwat ba kan wan ban maramot noh kloi ïa kane ka jaka buh Transformer bad ban nym ap haduh ban da jia ki jingjia ba sngewsih.
