Shillong, Jylliew 23
U Symbud Myntri Rangbah ka Jylla ka tnad Transport, Bah Sniawbhalang Dhar ha ka Sngi Ba-ar u la ong ba ka Sorkar Jylla kan sdang ban ai laisen ïa ki nongkamai ne taksi ar-shaka (two-wheeler taxi aggregator) bad ki nongpynïaid shimet hapoh ki ar taïew ban wan, ynda la dep ka jingïalang kaba la buh ban long ha ka taïew ban wan.
U Bah Dhar u la ong ba yn ai laisen ha ka kyrdan jong ka Jylla sha baroh ki nongaplai kiba dei hok bad kiba don ïa ki kot ki sla kiba biang.
“Ngan don ka jingïalang ha ka taïew ban wan, kumta hadien shiphew sngi ne ar taïew, ngin sa ai laisen sha kino-kino kiba aplai, la ki briew shimet ne ki ‘Aggregator’, lada ki kot ki sla jong ki ki long kiba biang. Kan dei ka laisen jong ka Jylla,” la ong u Bah Dhar.
U la ong ba la bthah ïa ki ophisar ka tnad ‘Transport’ ban pynjur ïa ka jingpynjari aiñ bad ban leh eiei ïa ki ‘Bike Taxi’ bym don laisen kiba ïaid bad treikam ha surok.
“Nga la bthah ïa ki ophisar jong nga ban pynkhlaiñ ïa ka jingpeitngor jong ki bad ban pynshitom ïa kito kiba treikam be-aiñ ha surok,” u la pynpaw.
U la bynrap ba ka tnad ka dang lum thup ïa ki jingtip halor ki aplikeshon bad ka jingbud ryntih. Ïa ki jingkheiñ ba tikna halor ki laisen ba la ai yn sa ïasam ynda la pyntreikam pura ïa kane ka jingpynïaid kam.
“Ngi dang lum ïa ki jingtip. Ngi dang hap ban pyntreikam pura. Shisien ba la pyntreikam pura, tang hangta ngan sa lah ban ïathuh sha phi katno ngut ki la ïoh laisen,” la ong u Bah Dhar.
