Shillong, Jylliew 23
U Myntri Rangbah ka Jylla, u Conrad K Sangma ha ka sngi Ba-ar, u la pynïaid ïa ka jingïalang bishar kam kaba bniah bha jong ka tnad Education hapoh State Guest House, Taraghar, Shillong, ban bishar ïa ki kam kiba dangïaid kiba thmu ban pynbha ïa ki jingtei jong ki skul, ki jingmih na ka pule dangle, ka bha ka miat ki khynnah pule bad ka jinglah treikam ka Jylla ha ka Performance Grading Index (PGI).
Ha ka jingïalang, ki ophisar ki la ai ïa ka jingbatai kaba bniah halor ki nongrim jong ka Meghalaya PGI bad batai ïa ki buit treikam ban pynjanai ïa ka jingtreikam lyngba ka jingai jingtip ba kham bha, jingpynbiang ïa ki data, ki jingbud ryntih bad ka jingïarap ba la buh da ka thong ha ka kyrdan jong ki skul.
U Myntri Rangbah u la bishar ïa ki jingduna ha la ki jong ki jong ki nongrim ai kyrdan bad bthah ïa ka tnad ba kan pynkhreh ïa ki plan ba kyrpang, kiba lah ban pyntreikam ha ki skul, khnang ban weng ïa ki jingduna ha ki jingeh, ki jingpynïaid bad ka rukom ai jingtip.
U Myntri Rangbah u la ban jur ba ka kyrdan ba ïoh ka Meghalaya, kam shym la pyni ïa kaba dei hok na ki kam ba la leh ha ka kam pule dangle bad pynpaw ba bun ki jingduna ki mih na ka rukom ai jingtip bad ki jingduna ka jingpeit thuh.
U la bthah ïa ka tnad, ba kan shim ïa ka lad peit thuh kaba la pynbeit ryntih bad ban pyndonkam kham bha ïa ki teknoloji bad ki jingkheiñ jingdiah, ban ithuh ïa ki kam kiba donkam ban hap ban leh ei-ei.
Haba bishar ïa ki nongrim ba ïadei bad ki jingtei, u Myntri Rangbah u la ban jur ïa ka jingdonkam ban pynkhlaiñ ïa ka jingïoh ïa ki ICT facilities, smart classroom, science laboratory, jaka pule, library, kamra shna jingshna kti bad thoh dur, ki jaka pynlang umslap bad ki jingpynbiang um dih ha ki skul.
U la bthah ïa ki ophisar, ba kin ithuh ïa ki sienjam kiba duna ka jinglut kiba lah ban ïarap ïa ki skul ba kin kot ïa ki kyndon ba la buh haba pynthikna ïa ka jaka pule ban long kaba sngewtynnad.
Ka jingïalang ka la bishar ruh ïa ki lad ki lynti ban pynkhlaiñ ïa ka pule dangle kaba kynthup lang. Ki Ophisar ki la pynsngew ïa ki jingthmu ban pynbiang ïa ki jingdonkam na ka bynta ka Children With Special Needs (CWSN), kynthup ki ramp, ki paiñkhana ba ki lah ban leit, ki teknoloji bad ki prokram ai jinghikai ïa ki nonghikai.
U Myntri Rangbah u la bthah ruh ïa ka tnad ban pynthikna ba ki skul kin ïoh ïa ka jingkyrshan ban pyndep ïa ki kyndon ba la buh bad ba ki khynnah kiba don jingduna dkhot met kin ïoh ïa ki jingïarap kaba biang.
La ïakren bniah ruh halor ka koit ka khiah ki khynnah pule, ka jingbam tei met bad ki kam ba ïadei bad ka bha ka miat.
Ki ophisar ki la pynsngew ïa ki jingpyrshang ban pynkhlaiñ ïa ka jingkhmih bniah ïa ka koit ka khiah ba man u snem, ki prokram ban batai ïa ki jingbam tei met, ka jingïasyllok ïa ki kam ki jam bad ka jingpynsngewthuh halor ka jingshngaiñ ki kor internet ha ki skul.
U Myntri Rangbah u la ban jur ïa ka jingpynrung lang ïa ka koit ka khiah, ka bam tei met bad ki jingtuklar ha ka pule dangle ban pynjanai ïa ka bha ka miat ki khynnah skul bad ki jingmih na ki jingpule.
Ka jingïalang ka la bishar ruh ïa ki buit treikam ban pynïoh ïa ki paiñkhana kiba bha bad ka jingïoh ïa ka umbam umdih ha ki skul. U Myntri Rangbah u la bthah ïa ka Tnad ba kan leit lum jingtip na man ki skul bad ban buh thup ïa ki jaka pule kat kum ki jingdonkam jong ki, kynthup ka jingsam umbam umdih, ka jaka buh tiar, ka jaka pynlang um slap bad kiwei-kiwei.
Ki ophisar ki la batai ruh ïa u Myntri Rangbah halor ki jingthmu ban pynkhlaiñ ïa ka Parent-Teacher Meeting (PTM) bad ka jingïashimbynta ki shnong ki thaw ha ka pule dangle.
U Myntri Rangbah u la pynpaw ba ka jingïatreilang kaba khlaiñ hapdeng ki skul bad ki kmie kpa, ka long kaba kongsan bha ban pynkhlaiñ ïa ka jingmih na ki jingpule bad pynshlur ïa ka tnad ba kan pynsngewthuh bha haba ïadei bad ka jingpynïadon bynta ki kmie kpa ha ka pule dangle ki khun.
Haba pynwai ïa ka jingïalang, u Myntri Rangbah u la bthah ïa ka tnad ba kan pynkhreh ïa ka lynti treikam kaba bniah kaba don bad ka jingbuh por kaba shai, ki jingdonkam song pisa bad ki lad peit thuh ban kyntiew ïa ka PGI performance, pynkhaiñ ïa ki jingtei jong ki skul, ban kyntiew ïa ka bha ka miat ki khynnah pule bad pynjanai ïa ka jingmih na ki jingpule.
