Shillong, Jylliew 23
U Bah Winston Tony Lyngdoh Chief Executive Member (CEM) ka Khasi Hills Autonomous District Council (KHADC) u la kyntait ïa ka jingkynnoh u Bah Barikupar Synrem, MDC Shylla, ba ka Executive Committee ba mynta ka dang ai Trading License ïa ki bar jylla ban leh ïa ki kam kiba lah ban trei hi da ki trai ri trai muluk.
Kane ka jingkynnoh ka mih ha ka sngi kut ka dorbar mang tyngka ha District Council kaba dang shu dep shen.
Haba kren sha ki lad pathai khubor ha ka 23 tarik u Jylliew 2026, u Bah Winston Tony Lyngdoh u ong “Mynshuwa ka jingai Trading License ka poi haduh 200 tam ei-ei ha ka shisnem, hynrei ha ka EC ba la ïalam da ka VPP ka jingai Trading License ka la poi tang ha ki 99 tylli.
U Bah Winston u la ong ba ha u snem 2021-22, ka jingai Trading License ha ka shi snem ka la palat ïa ka 200 tylli, bad kumjuh ruh ha u snem 2023-24 ka la palat biang ïa ka 200 tylli.
Hynrei, naduh u snem 2025-26, hadien ba ka Executive Committee kaba ïalam da ka Voice of the People Party (VPP) ka la shimti ïa ka bor synshar, ka jingai Trading License ka la hiar sha ka 99 tylli, bad mynta u snem ka dang poi tang sha ka 30 tylli.
“Ïa kine ki Lisen ka long tang ïa kito ki nongtrei kontrak kiba trei hapoh ka Airport Authority of India bad kiwei pat kiba wan nabar lyngba ka GeM Portal,” u la ong.
Halor ka jingkynnoh ba ka KHADC ka la pynduh ïa ka Blinkit ha Nongthymmai, hynrei ka la ai pat ïa ka Bar bad Restaurant, u Bah Winston u la ong ba naduh u snem ba la dep, ka KHADC ka la dep ban khang ïa ka Blinkit ha Fire Brigade.
U la ïathuh ruh ba ki dkhot jong ka Grocery Association ki la wan ban kynduh bad ki la pynpaw ïa ka jingsngewkhia jong ki, ba lada ai Trading License ïa ka Blinkit, palat 4,000 tylli ki dukan die marbam jong ki trai ri trai muluk, kin duh noh ïa ka lad kamai.
Namarkata, u la ong ba ka KHADC kam shym la ai Trading License ïa ka Blinkit, watla ka Blinkit ka dang pyrshang katba lah ban ïoh ïa ka Trading License bad ka la pan ruh ïa ka No Objection Certificate na Nongrim Hills, kaba u Rangbah Shnong u la ai, hynrei haduh mynta pat ym pat poi satia sha KHADC ka jingaplai Trading License.
U Bah Winston u la ong ruh ba don sa kiwei pat kiba leh Home Delivery, hynrei ka KHADC ka la pyrkhing ïa kine ki jait kam, namar ki lah ban ktah bad pynhiar ïa ka jingïoh kamai ki trai muluk.
Nalor kata, u la ïathuh ba ka don tang kawei ka dukan Alaya kaba u la ai Trading License, kaba dei halor ka jingïatreilang hapdeng kawei ka Kong kaba dei ka Khasi na Laitumkhrah bad u Manish Agarwal, hadien ba ki la dep pynbiang ïa baroh ki kot ki sla kiba donkam.
U la ong ba katei ka kam, kadei jong u wei u bar jylla uba ka lok jong u ka dei ka Khasi, bad kidei ruh ki nongshong shnong kiba la slem bha ha ka Jylla. “Lada dei ki briew kiba shu wan thymmai na shabar jylla, ka KHADC kan ym ai satia ïa ka Trading License,” la bynrap u Bah Winston.
Shuh shuh u la ïathuh ba hadien ba la nujor bniah ïa ki kot ki sla, la shem ba ki la pynbiang ïa baroh ki jingdonkam katkum ka kyndon.
Ha kajuh ka por, u la ïathuh ba ka KHADC ka la dep pynmih ruh ïa ka jingpyntip (Notification) sha ki Dorbar Shnong ba kim dei ban ai No Objection Certificate ne NOC na ka bynta ki jait kam kiba ki trai ri trai muluk ki la lah ban trei hi dalade.
